തൃശൂർ എരുമപ്പെട്ടി കുണ്ടന്നൂരിൽ പൊട്ടിവീണ വൈദ്യുതി കമ്പിയിൽനിന്നു ഷോക്കേറ്റ് വീട്ടമ്മ മരിച്ചു. തെക്കേക്കര മാളിയേക്കൽ വീട്ടിൽ ജൂലി (48) ആണു മരിച്ചത്. ഒപ്പമുണ്ടായിരുന്ന ഭർത്താവ് ബെന്നിക്കും ഷോക്കേറ്റു. പറമ്പിലെ മോട്ടോർ പുരയിലേക്ക് പോയിരുന്ന വൈദ്യുതി ലൈനാണു പൊട്ടിവീണത്. വീടിനോടു ചേർന്നുള്ള കൃഷിയിടത്തിൽ പോയതായിരുന്നു ഇവർ.

വെള്ളിയാഴ്ച രാവിലെയാണ് അപകടം സംഭവിച്ചത്. വീടിനോടു ചേർന്ന കൃഷിയിടത്തിൽ തേങ്ങ വീണുകിടന്നിരുന്നത് എടുക്കാൻ പോയതായിരുന്നു ജൂലിയും ബെന്നിയും. തോട്ടത്തിലെ മോട്ടോർ പുരയിലേക്കുള്ള വൈദ്യുതി ലൈൻ പൊട്ടിവീണുകിടന്നിരുന്നത് ഇവരുടെ ശ്രദ്ധയിൽപ്പെട്ടിരുന്നില്ല. ഷോക്കേറ്റ ജൂലിയെ ഉടൻ തന്നെ മെഡിക്കൽ കോളേജ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.