നടൻ സൗബിൻ ഷാഹിർ പ്രതിയായ 'മഞ്ഞുമ്മൽ ബോയ്സ്' സാമ്പത്തിക തട്ടിപ്പ് കേസ് അന്വേഷിക്കാൻ പ്രത്യേക സംഘം രൂപീകരിച്ചു. എറണാകുളം ഡിസിപി വിനോദ് പിള്ളയുടെ മേൽനോട്ടത്തിൽ ക്രൈംബ്രാഞ്ച് ഡിവൈഎസ്പി ലത്തീഫ് അന്വേഷണം നയിക്കും. നിലവിൽ കേസ് കൈകാര്യം ചെയ്യുന്ന സൗത്ത് എസിപി രാജ്കുമാറും സംഘത്തിലുണ്ടാകും.

പ്രത്യേക അന്വേഷണം ആവശ്യപ്പെട്ട് പരാതിക്കാരൻ നേരിട്ട് ഡിജിപിയെ സമീപിച്ചിരുന്നു. കേസ് അട്ടിമറിക്കപ്പെടാനുള്ള സാധ്യതയുണ്ടെന്നായിരുന്നു അദ്ദേഹത്തിന്റെ ആരോപണം. അരൂർ സ്വദേശി നൽകിയ പരാതിയിലാണ് കേസ്. ഏഴ് കോടി രൂപ ഈ സിനിമയുമായി ബന്ധപ്പെട്ട് താൻ ചിലവാക്കിയിരുന്നു. എന്നാൽ ലാഭ വിഹിതം തനിക്ക് നൽകിയില്ല. തന്നെ പറഞ്ഞ് കബളിപ്പിച്ചു, തുടങ്ങിയ ആരോപണങ്ങൾ ഉന്നയിച്ചായിരുന്നു പരാതി