2026-ൽ അമേരിക്ക, കാനഡ, മെക്സിക്കോ എന്നിവിടങ്ങളിൽ നടക്കുന്ന ഫിഫ ലോകകപ്പിൽ എല്ലാ മത്സരങ്ങളിലും ഹൈഡ്രേഷൻ ബ്രേക്ക് (ജലം കുടിക്കാനുള്ള ഇടവേള) നിർബന്ധമാക്കിക്കൊണ്ട് ഫിഫ പ്രഖ്യാപനം നടത്തി. ടൂർണമെന്റ് നടക്കുന്ന സമയത്ത് താപനില ഉയരാനുള്ള സാധ്യത കണക്കിലെടുത്താണ് ഫിഫയുടെ ഈ തീരുമാനം. ഓരോ മത്സരത്തിലെയും രണ്ട് പകുതികളിലും ഒരു ഹൈഡ്രേഷൻ ബ്രേക്ക് വീതം ഉണ്ടാകും.

മത്സരത്തിന്റെ ആദ്യ പകുതിയിൽ 22-ാം മിനിറ്റിലും രണ്ടാം പകുതിയിൽ 67-ാം മിനിറ്റിലുമാണ് കളി നിർത്തിവെക്കുക. ഒരു ഹൈഡ്രേഷൻ ബ്രേക്കിന്റെ ദൈർഘ്യം മൂന്ന് മിനിറ്റ് വരെയായിരിക്കും. ഈ വർഷം നടന്ന ക്ലബ് ലോകകപ്പിൽ ചില മത്സരങ്ങളിൽ താപനില 38 ഡിഗ്രി സെൽഷ്യസ് വരെ ഉയർന്നതിനെ തുടർന്ന് അനിശ്ചിതമായി വാട്ടർ ബ്രേക്കുകൾ നൽകിയിരുന്നു. എന്നാൽ, ലോകകപ്പിലേക്ക് വരുമ്പോൾ എല്ലാ മത്സരങ്ങളിലും ഈ ബ്രേക്ക് ഉണ്ടാകും എന്ന് ഫിഫ നേരത്തെ ഉറപ്പ് നൽകിയിരുന്നു. കളിക്കാർക്ക് കടുത്ത ചൂടിൽ നിർജലീകരണം (Dehydration) സംഭവിക്കുന്നത് ഒഴിവാക്കാനും അവരുടെ പ്രകടനം മെച്ചപ്പെടുത്താനും ഈ തീരുമാനം സഹായകമാകും.