എപ്പിസോഡുകളായി അപ്‌ലോഡ് ചെയ്യുന്ന റീലുകൾ ഇനി പ്രൊഫൈലിൽ കയറി ഓരോന്നായി തിരഞ്ഞുപിടിച്ച് ബുദ്ധിമുട്ടേണ്ടി വരില്ല. ഇൻസ്റ്റഗ്രാമിലും ഫേസ്ബുക്കിലും റീലുകൾ കൃത്യമായ ക്രമത്തിൽ ഒരുമിച്ച് കാണാൻ സഹായിക്കുന്ന 'സീരീസ്' (Series) എന്ന പുതിയ ഫീച്ചർ മെറ്റ പരീക്ഷിക്കുകയാണ്. യൂട്യൂബിലെ പ്ലേലിസ്റ്റുകൾക്ക് സമാനമായ ഈ ഫീച്ചർ ഉടൻ തന്നെ എല്ലാവരിലേക്കും എത്തിയേക്കുമെന്നാണ് റിപ്പോർട്ടുകൾ. ഒരു നിശ്ചിത വിഷയത്തെ ആസ്പദമാക്കിയുള്ള ഒന്നിലധികം റീലുകളെ ഒരു കളക്ഷനായി ക്രോഡീകരിക്കാൻ ക്രിയേറ്റർമാരെ സഹായിക്കുന്നതാണ് ഈ ഫീച്ചർ. തങ്ങളുടെ പുതിയതും പഴയതുമായ റീലുകളെ ഒരൊറ്റ ഫോൾഡറിലേക്ക് മാറ്റാൻ ഇതിലൂടെ സാധിക്കും. ഈ കളക്ഷനിലെ ഓരോ റീലും ഒരു വലിയ പരമ്പരയിലെ 'എപ്പിസോഡുകൾ' എന്ന രീതിയിലാകും ക്രമീകരിക്കപ്പെടുക. ക്രിയേറ്റർമാരുടെ പ്രൊഫൈലിലെ പ്രത്യേക പേജിൽ ഈ വീഡിയോകൾ ലഭ്യമാകും.

തുടർച്ചയായി പോസ്റ്റ് ചെയ്യുന്ന ട്യൂട്ടോറിയലുകൾ, വിദ്യാഭ്യാസപരമായ വിഡിയോകൾ, ചലഞ്ചുകൾ, കഥപറച്ചിലുകൾ, മൾട്ടി-പാർട്ട് റിവ്യൂകൾ എന്നിവ ചെയ്യുന്നവർക്ക് ഈ ഫീച്ചർ ഏറെ പ്രയോജനപ്പെടും. റീലുകൾ സ്ക്രോൾ ചെയ്യുന്നതിനിടയിൽ തന്നെ ഉപഭോക്താക്കൾക്ക് ഈ 'സീരീസ്' ഓപ്പൺ ചെയ്യാനും അതുമായി ബന്ധപ്പെട്ട മറ്റ് വിഡിയോകൾ ബ്രൗസ് ചെയ്യാനും സാധിക്കും. കൂടാതെ, താൽപര്യമുള്ള സീരീസുകൾ പിന്നീട് കാണാനായി സേവ് ചെയ്യാനും, പുതിയ എപ്പിസോഡുകൾ വരുമ്പോൾ നോട്ടിഫിക്കേഷൻ ലഭിക്കാനുമുള്ള സൗകര്യവുമുണ്ടാകും. മെറ്റയുടെ പ്രധാന എതിരാളികളായ ടിക്ടോക് 2023-ൽ തന്നെ സമാനമായ ഫീച്ചർ അവതരിപ്പിച്ചിരുന്നു. നിലവിൽ ഉള്ളടക്കങ്ങൾ കൃത്യമായി ക്രമീകരിക്കാൻ മാത്രമാണ് മെറ്റ ഈ ഫീച്ചർ ഉപയോഗിക്കുന്നതെങ്കിലും, ഭാവിയിൽ ഇതിലൂടെ ക്രിയേറ്റർമാർക്ക് വരുമാനം കണ്ടെത്താനുള്ള പെയ്ഡ് സബ്‌സ്‌ക്രിപ്ഷൻ വഴികളും കമ്പനി ആലോചിക്കുന്നുണ്ടെന്നാണ് വിവരം.

നിലവിൽ തിരഞ്ഞെടുക്കപ്പെട്ട ചില ക്രിയേറ്റർമാരിൽ മാത്രമാണ് ഈ ഫീച്ചർ പരീക്ഷിക്കുന്നത്. പരീക്ഷണ ഘട്ടം പൂർത്തിയായ ശേഷമേ ഈ ഫീച്ചർ ആഗോളതലത്തിൽ എല്ലാ ഉപഭോക്താക്കൾക്കുമായി എപ്പോൾ ലഭ്യമാക്കുമെന്ന കാര്യത്തിൽ മെറ്റയുടെ ഔദ്യോഗിക പ്രഖ്യാപനമുണ്ടാകൂ.