ആലപ്പുഴ തുറവൂരിൽ ബൈക്കിന് പിന്നിൽ സ്വകാര്യ ബസ്സിടിച്ച് 12 വയസ്സുകാരൻ മരിച്ചു. വയലാർ സ്വദേശി നിഷാദിന്റെ മകൻ ശബരീശൻ അയ്യൻ (12) ആണ് മരിച്ചത്. ബൈക്കിൽ അച്ഛനൊപ്പം യാത്ര ചെയ്യുകയായിരുന്നു. ദേശീയപാതയിൽ പത്മാക്ഷികവലയ്ക്ക് സമീപം തിങ്കളാഴ്ച രാവിലെ 8.30-നാണ് സംഭവം. പട്ടണക്കാട് ബിഷപ് മൂർ സ്‌കൂൾ 5-ാം ക്ലാസ് വിദ്യാർഥിയായിരുന്നു.

നിഷാദും ശബരീശൻ അയ്യനും ശബരീശന്റെ സഹോദരനും ഒന്നിച്ച് വയലാറിൽനിന്ന് തുറവൂരിലേക്ക് ബൈക്കിൽ പോകുന്നതിനിടെയാണ് അപകടം. ബസ് ബൈക്കിൽ തട്ടിയതോടെ ബൈക്ക് നിയന്ത്രണം വിടുകയും പിന്നിലിരുന്ന ശബരി അയ്യൻ പാതയിൽ തെറിച്ചുവീണ് സ്വകാര്യ ബസ്സിനടിയിൽപ്പെടുകയുമായിരുന്നു.

ബസിന്റെ പിൻചക്രം കയറിയിറങ്ങി ശബരീശൻ തൽക്ഷണം മരിച്ചു. നിസ്സാര പരിക്കുകളോടെ നിഷാദും ശബരീശന്റെ സഹോദരനും തുറവൂർ ഗവ. ആശുപത്രിയിൽ ചികിത്സയിലാണ്.