അലർജി ഉണ്ടാക്കുന്ന ഘടകങ്ങൾ രേഖപ്പെടുത്തണം; കോസ്‌മെറ്റിക്‌സ് ഉൽപന്നങ്ങൾക്ക് ഒമാനിൽ പുതിയ ലേബലിങ് നിയമം

ഒമാനിൽ വിൽക്കുന്ന സൗന്ദര്യവർധക വസ്തുക്കളിലും (Cosmetics) വ്യക്തിഗത പരിചരണ ഉൽപന്നങ്ങളിലും അടങ്ങിയിരിക്കുന്ന അലർജിക്ക് കാരണമാകുന്ന ഘടകങ്ങൾ പാക്കറ്റിൽ കൃത്യമായി രേഖപ്പെടുത്തണമെന്ന് വാണിജ്യ മന്ത്രാലയം നിർബന്ധമാക്കി. ഉപഭോക്താക്കളുടെ ആരോഗ്യ സുരക്ഷ മുൻനിർത്തി ജി.സി.സി സാങ്കേതിക നിയമാവലി പ്രകാരമാണ് ഈ പുതിയ പരിഷ്‌കാരം നടപ്പിലാക്കുന്നത്. ഉൽപന്നങ്ങളിൽ അടങ്ങിയിട്ടുള്ളതും അലർജിയുണ്ടാക്കാൻ സാധ്യതയുള്ളതുമായ 80 ഘടകങ്ങളുടെ പുതുക്കിയ പട്ടിക മന്ത്രാലയം പുറത്തുവിട്ടിട്ടുണ്ട്. നിർമാതാക്കളും ഇറക്കുമതിക്കാരും തങ്ങളുടെ ഉൽപന്നങ്ങളിൽ ഇവ അടങ്ങിയിട്ടുണ്ടെങ്കിൽ അത് ലേബലിൽ വ്യക്തമായി കാണിച്ചിരിക്കണം.

നിയന്ത്രണങ്ങൾ പാലിക്കാത്ത പുതിയ ഉൽപന്നങ്ങളുടെ ഇറക്കുമതിയും പ്രാദേശിക ഉൽപാദനവും 2026 ഡിസംബർ 31 മുതൽ ഒമാനിൽ പൂർണമായും നിരോധിക്കുമെന്നും അധികൃതർ വ്യക്തമാക്കി. അതേസമയം, നിലവിൽ ഒമാൻ വിപണിയിലുള്ള ഉൽപന്നങ്ങൾക്ക് ഈ പുതിയ മാറ്റങ്ങൾ വരുത്തുന്നതിനായി 2028 ഡിസംബർ 31 വരെ സാവകാശം അനുവദിച്ചിട്ടുണ്ട്. ഈ രണ്ടു വർഷത്തെ കൃത്യമായ ഗ്രേസ് പീരിയഡിന് ശേഷവും വിപണിയിൽ നിയമം ലംഘിക്കുന്ന ഉൽപന്നങ്ങൾ കണ്ടെത്തിയാൽ അവ പിടിച്ചെടുക്കുകയും കടുത്ത നിയമനടപടികൾ സ്വീകരിക്കുകയും ചെയ്യും. സുരക്ഷിതമായ വിപണി ഉറപ്പുവരുത്താൻ വ്യാപാരികളും നിർമാതാക്കളും ഈ നിർദേശങ്ങൾ കർശനമായി പാലിക്കണമെന്ന് മന്ത്രാലയം അഭ്യർഥിച്ചു.