സൗദിയിൽ അരാംകോ ഹെലികോപ്റ്റർ തകർന്നു വീണു; 14 പേർ മരിച്ചു

ലോകത്തെ ഏറ്റവും വലിയ എണ്ണക്കമ്പനികളിലൊന്നായ സൗദി അരാംകോയുടെ (Saudi Aramco) ഹെലികോപ്റ്റർ തകർന്നു വീണ് 14 പേർ മരിച്ചു. സൗദി അറേബ്യയുടെ കിഴക്കൻ പ്രവിശ്യയിലെ (Eastern Province) പ്രധാന എണ്ണ ശുദ്ധീകരണ കയറ്റുമതി കേന്ദ്രമായ റാസ് തനൂറയിൽ (Ras Tanura) ഇന്ന് പുലർച്ചെ ആറ് മണിയോടെയായിരുന്നു ദരുണമായ ഈ അപകടം സംഭവിച്ചത്. ഹെലികോപ്റ്ററിൽ ഉണ്ടായിരുന്ന 14 പേരും സംഭവസ്ഥലത്തു തന്നെ മരണപ്പെടുകയായിരുന്നു.

മരിച്ചവരെല്ലാം സൗദി പൗരന്മാരാണെന്ന് ഊർജ്ജ മന്ത്രാലയം വക്താവ് ഔദ്യോഗികമായി സ്ഥിരീകരിച്ചു. അരാംകോയുടെ ജീവനക്കാരും സാങ്കേതിക വിദഗ്ധരുമാണ് ഹെലികോപ്റ്ററിലുണ്ടായിരുന്നതെന്നാണ് പ്രാഥമിക വിവരം. അപകടം നടന്നയുടൻ തന്നെ അടിയന്തിര രക്ഷാപ്രവർത്തകരും സിവിൽ ഡിഫൻസ് വിഭാഗവും സ്ഥലത്തെത്തി തുടർനടപടികൾ സ്വീകരിച്ചു.

സാങ്കേതിക തകരാറാണോ അതോ മോശം കാലാവസ്ഥയാണോ അപകടത്തിന് കാരണമായതെന്ന് വ്യക്തമല്ല. അപകടത്തിന്റെ കൃത്യമായ കാരണം കണ്ടെത്താൻ വിമാന അപകടങ്ങളെക്കുറിച്ച് അന്വേഷിക്കുന്ന പ്രത്യേക അന്വേഷണ സംഘത്തിനും ബന്ധപ്പെട്ട മറ്റ് വകുപ്പുകൾക്കും നിർദ്ദേശം നൽകിയിട്ടുണ്ടെന്ന് അധികൃതർ വ്യക്തമാക്കി. ദാരുണമായ അപകടത്തിൽ മരിച്ചവരുടെ കുടുംബാംഗങ്ങളുടെ കടുത്ത ദുഃഖത്തിൽ പങ്കുചേരുന്നതായും മന്ത്രാലയവും അരാംകോ മാനേജ്‌മെന്റും അറിയിച്ചു.