ഉംറ തീർത്ഥാടകർക്ക് കരുതൽ; റമദാൻ രണ്ടാം പത്തിൽ 70,000-ത്തിലധികം മെഡിക്കൽ സേവനങ്ങളുമായി സൗദി

വിശുദ്ധ റമദാൻ മാസത്തിൽ ഉംറ നിർവഹിക്കാനെത്തുന്ന തീർത്ഥാടകർക്ക് വിപുലമായ ആരോഗ്യ പരിരക്ഷയുമായി സൗദി ആരോഗ്യ മന്ത്രാലയം. റമദാനിലെ രണ്ടാം പത്തിൽ മാത്രം 70,287 മെഡിക്കൽ സേവനങ്ങൾ തീർത്ഥാടകർക്ക് നൽകിയതായി മന്ത്രാലയം വെളിപ്പെടുത്തി. തീർത്ഥാടകരുടെ സുരക്ഷയും ആശ്വാസവും ഉറപ്പാക്കുന്ന സൗദി വിഷൻ 2030-ന്റെ ഭാഗമായുള്ള വിവിധ പദ്ധതികളുടെ ഏകോപനത്തിലൂടെയാണ് ഈ നേട്ടം കൈവരിച്ചത്.

വിവിധ ആശുപത്രികളിലെ എമർജൻസി വിഭാഗങ്ങളിലൂടെ 42,422 പേർക്ക് അടിയന്തര ചികിത്സ ലഭ്യമാക്കി. കൂടാതെ 24,091 പേർ പ്രാഥമിക ആരോഗ്യ കേന്ദ്രങ്ങളുടെ സേവനവും പ്രയോജനപ്പെടുത്തി. 278 ശസ്ത്രക്രിയകളാണ് ഈ കാലയളവിൽ നടന്നത്; ഇതിൽ 111 എണ്ണം അതിപ്രധാനമായ ഹൃദയസംബന്ധമായ കത്തീറ്ററൈസേഷൻ നടപടികളായിരുന്നു. വിദഗ്ധ ചികിത്സ ആവശ്യമായി വന്ന 3,385 പേരെ വിവിധ ആശുപത്രികളിൽ അഡ്മിറ്റ് ചെയ്ത് പരിചരണം നൽകി.

മന്ത്രാലയത്തിന്റെ നേരിട്ടുള്ള മേൽനോട്ടത്തിൽ അന്താരാഷ്ട്ര നിലവാരത്തിലുള്ള സുരക്ഷാ മാനദണ്ഡങ്ങൾ പാലിച്ചാണ് ഓരോ ചികിത്സയും ലഭ്യമാക്കുന്നത്. റമദാൻ അവസാന പത്തിലേക്ക് കടക്കുമ്പോൾ തിരക്ക് വർധിക്കാനുള്ള സാധ്യത കണക്കിലെടുത്ത് കൂടുതൽ മെഡിക്കൽ ടീമുകളെയും സജ്ജീകരണങ്ങളെയും പുണ്യസ്ഥലങ്ങളിൽ വിന്യസിച്ചിട്ടുണ്ടെന്നും അധികൃതർ വ്യക്തമാക്കി. തീർത്ഥാടകർക്ക് തടസ്സമില്ലാതെ കർമ്മങ്ങൾ നിർവഹിക്കാൻ ആവശ്യമായ എല്ലാ പിന്തുണയും ആരോഗ്യ വിഭാഗം ഉറപ്പുനൽകുന്നു.