ഷാർജയിൽ നിന്നുള്ള ചരക്കുവിമാനം അറബിക്കടലിൽ തകർന്നുവീണു; 5 ജീവനക്കാരെ കണ്ടെത്താൻ തിരച്ചിൽ ഊർജ്ജിതം

ഷാർജയിൽ നിന്നും പാകിസ്താനിലെ കറാച്ചിയിലേക്ക് പുറപ്പെട്ട സ്വകാര്യ ചരക്കുവിമാനം അറബിക്കടലിൽ തകർന്നുവീണു. അപകടത്തിൽ പാക് പ്രധാനമന്ത്രി മുഹമ്മദ് ഷഹബാസ് ഷെരീഫ് കടുത്ത ദുഃഖവും അനുശോചനവും രേഖപ്പെടുത്തി. വിമാനം തകർന്നുവീണതായി പ്രധാനമന്ത്രിയുടെ ഓഫീസ് ഔദ്യോഗികമായി സ്ഥിരീകരിച്ചു.

വിമാനത്തിലുണ്ടായിരുന്ന അഞ്ച് ജീവനക്കാരുടെ കുടുംബാംഗങ്ങളുടെ ദുഃഖത്തിൽ പങ്കുചേരുന്നതായി പ്രധാനമന്ത്രി അറിയിച്ചു. കാണാതായ ജീവനക്കാരെ കണ്ടെത്തുന്നതിനായി പാകിസ്താൻ സിവിൽ ഏവിയേഷൻ അതോറിറ്റി, പാക് നാവികസേന, വ്യോമസേന എന്നിവയോട് അറബിക്കടലിൽ തിരച്ചിലും രക്ഷാപ്രവർത്തനവും ശക്തമാക്കാൻ അദ്ദേഹം നിർദ്ദേശം നൽകിയിട്ടുണ്ട്. ലഭ്യമായ എല്ലാ വിഭവങ്ങളും ഇതിനായി വിനിയോഗിക്കാനും പ്രധാനമന്ത്രി ഉത്തരവിട്ടു.

ഷാർജയിൽ നിന്നും പറന്നുയർന്ന വിമാനം കറാച്ചിയിലെത്തുന്നതിന് മുൻപാണ് റഡാറുകളിൽ നിന്നും അപ്രത്യക്ഷമായതും തുടർന്ന് കടലിൽ തകർന്നുവീണതും. അപകടത്തിന്റെ കാരണത്തെക്കുറിച്ചുള്ള കൂടുതൽ വിവരങ്ങൾ ലഭ്യമായിട്ടില്ല. കടലിൽ വ്യോമ-നാവിക സേനകളുടെ നേതൃത്വത്തിൽ ഊർജ്ജിതമായ തിരച്ചിൽ പുരോഗമിക്കുകയാണ്.