ആശയവിനിമയം നഷ്ടപ്പെട്ടു; റഷ്യൻ സൈനിക വിമാനം തകർന്നു വീണ് 29 മരണം

ക്രിമിയയിൽ റഷ്യൻ സൈനിക വിമാനം തകർന്നു വീണ് വൻ ദുരന്തം. വിമാനത്തിലുണ്ടായിരുന്ന 23 യാത്രക്കാരും 6 ക്രൂ അംഗങ്ങളും ഉൾപ്പെടെ 29 പേരും മരിച്ചതായി റഷ്യൻ പ്രതിരോധ മന്ത്രാലയം സ്ഥിരീകരിച്ചു. ബുധനാഴ്ച പുലർച്ചെയായിരുന്നു റഷ്യൻ വ്യോമസേനയുടെ 'എഎൻ-26' (An-26) കാർഗോ വിമാനം അപകടത്തിൽപ്പെട്ടത്.

പർവ്വതമേഖലയിൽ ഇറങ്ങുന്നതിന് തൊട്ടുമുമ്പ് എയർ ട്രാഫിക് കൺട്രോളറുമായുള്ള വിമാനത്തിന്റെ ആശയവിനിമയം പൂർണ്ണമായും നഷ്ടപ്പെടുകയായിരുന്നു. തുടർന്ന് വിമാനം പാറക്കെട്ടിലിടിച്ചാണ് അപകടമുണ്ടായതെന്നാണ് വിവരം. രക്ഷാപ്രവർത്തകർ ഉടൻ തന്നെ അപകടസ്ഥലത്ത് എത്തിയെങ്കിലും ആരെയും ജീവനോടെ കണ്ടെത്താനായില്ല.

അപകടത്തിന് പിന്നിൽ അട്ടിമറി ശ്രമങ്ങൾ നടന്നിട്ടില്ലെന്നാണ് പ്രാഥമിക നിഗമനം. വിമാനത്തിനുണ്ടായ സാങ്കേതിക തകരാറാണ് അപകടത്തിലേക്ക് നയിച്ചതെന്നാണ് റഷ്യൻ പ്രതിരോധ മന്ത്രാലയത്തെ ഉദ്ധരിച്ച് ടാസ് (TASS) വാർത്താ ഏജൻസി റിപ്പോർട്ട് ചെയ്തത്. 2014-ൽ ഉക്രെയ്നിൽ നിന്ന് റഷ്യ പിടിച്ചെടുത്ത വിമാനമാണ് ഇപ്പോൾ തകർന്നതെന്നാണ് ലഭിക്കുന്ന വിവരം.

സംഭവത്തെക്കുറിച്ച് അന്വേഷിക്കാൻ പ്രതിരോധ മന്ത്രാലയം പ്രത്യേക സമിതിയെ നിയോഗിച്ചു. അന്വേഷണ സംഘം സ്ഥലത്തെത്തി വിമാനത്തിന്റെ അവശിഷ്ടങ്ങൾ പരിശോധിച്ചുവരികയാണ്.