സഹൽ ആപ്പ് വഴി ഇനി അഴിമതി പരാതികൾ നൽകാം; പുതിയ സേവനവുമായി കുവൈത്ത്

കുവൈത്തിൽ അഴിമതി സംബന്ധമായ പരാതികൾ നൽകുന്നതിനായി സർക്കാർ സേവന പ്ലാറ്റ്‌ഫോമായ ‘സഹൽ’ (Sahel) ആപ്പിൽ പുതിയ ഫീച്ചർ ആരംഭിച്ചു. കുവൈത്ത് അഴിമതി വിരുദ്ധ അതോറിറ്റിയായ ‘നസഹ’യാണ് (Nazaha) ഈ പുതിയ ഡിജിറ്റൽ സേവനം ഔദ്യോഗികമായി പ്രഖ്യാപിച്ചത്. രാജ്യത്ത് സുതാര്യത വർദ്ധിപ്പിക്കാനും അഴിമതി തുടച്ചുനീക്കാനുമുള്ള ശക്തമായ നടപടികളുടെ ഭാഗമായാണ് ഈ പരിഷ്കാരം.

പൊതുജനങ്ങൾക്ക് തങ്ങൾ ശ്രദ്ധയിൽപ്പെടുന്ന അഴിമതികളെക്കുറിച്ചുള്ള വിവരങ്ങൾ സുരക്ഷിതമായും പൂർണ്ണമായ രഹസ്യസ്വഭാവത്തോടെയും ഇനി ആപ്പ് വഴി റിപ്പോർട്ട് ചെയ്യാൻ സാധിക്കും. പരാതികൾ സമർപ്പിക്കുന്നതിനൊപ്പം അതുമായി ബന്ധപ്പെട്ട അധിക രേഖകൾ അപ്‌ലോഡ് ചെയ്യാനും, നൽകിയ പരാതിയുടെ നിലവിലെ സ്ഥിതി (Status) പരിശോധിക്കാനും ആപ്പിൽ സൗകര്യമൊരുക്കിയിട്ടുണ്ട്. അഴിമതിക്കെതിരെയുള്ള പോരാട്ടത്തിൽ പൊതുജന പങ്കാളിത്തം ഉറപ്പാക്കാനും കൂടുതൽ സുതാര്യമായ ഭരണസംവിധാനം കെട്ടിപ്പടുക്കാനും പുതിയ സംവിധാനം സഹായിക്കുമെന്ന് നസഹ അധികൃതർ വ്യക്തമാക്കുന്നു.