ഡ്രോൺ ഉടമസ്ഥാവകാശം ഇനി 'സഹൽ' ആപ്പ് വഴി രജിസ്റ്റർ ചെയ്യാം; പുതിയ ഡിജിറ്റൽ സേവനവുമായി കുവൈത്ത്

കുവൈത്തിലെ ഔദ്യോഗിക സർക്കാർ സേവന ആപ്പായ 'സഹൽ' (Sahel) വഴി ഡ്രോൺ ഉടമസ്ഥാവകാശം ഇനി മുതൽ ഡിജിറ്റലായി രജിസ്റ്റർ ചെയ്യാം. പൗരന്മാർക്കും താമസക്കാർക്കുമായി ഇതിനായുള്ള പുതിയ ഡിജിറ്റൽ സേവനം സഹൽ ആപ്ലിക്കേഷനിൽ ലഭ്യമാക്കിത്തുടങ്ങി.

ഈ പുതിയ സംവിധാനത്തിലൂടെ ഡ്രോൺ ഉടമസ്ഥാവകാശ വിവരങ്ങൾ ഇലക്ട്രോണിക് രീതിയിൽ സമർപ്പിക്കാനും, രജിസ്റ്റർ ചെയ്ത വിവരങ്ങളെക്കുറിച്ച് അന്വേഷിക്കാനും സാധിക്കും. കൂടാതെ, നിലവിലുള്ള രേഖകൾ അപ്ഡേറ്റ് ചെയ്യാനും ആവശ്യമെങ്കിൽ രജിസ്ട്രേഷൻ റദ്ദാക്കാനുമുള്ള സൗകര്യങ്ങളും ആപ്പിൽ ഒരുക്കിയിട്ടുണ്ട്.

രാജ്യത്തെ ഡിജിറ്റൽ സേവനങ്ങൾ കൂടുതൽ വിപുലീകരിക്കുക, സർക്കാർ നടപടിക്രമങ്ങൾ ലളിതമാക്കുക, ഉപഭോക്താക്കൾക്ക് ഇലക്ട്രോണിക് ഇടപാടുകളിലേക്കുള്ള പ്രവേശനം കൂടുതൽ സുഗമമാക്കുക എന്നിവയുടെ ഭാഗമായാണ് പുതിയ ഫീച്ചർ അവതരിപ്പിച്ചിരിക്കുന്നത്. സുരക്ഷാ മാനദണ്ഡങ്ങൾ പാലിച്ചുകൊണ്ട് ഡ്രോണുകളുടെ ഉപയോഗം കൃത്യമായി നിരീക്ഷിക്കാനും നിയന്ത്രിക്കാനും ഈ ഡിജിറ്റൽ രജിസ്ട്രേഷൻ സംവിധാനം സഹായിക്കും.