ദുബായ് ഗ്ലോബൽ വില്ലേജ് ഏപ്രിൽ 20 മുതൽ വീണ്ടും തുറക്കുന്നു

യുഎസ്-ഇറാൻ സംഘർഷത്തെത്തുടർന്ന് താൽക്കാലികമായി അടച്ചിട്ടിരുന്ന ദുബായ് ഗ്ലോബൽ വില്ലേജ് വീണ്ടും തുറക്കുന്നു. ഒരു മാസത്തിലേറെ നീണ്ട ഇടവേളയ്ക്ക് ശേഷം ഏപ്രിൽ 20 തിങ്കളാഴ്ച വൈകുന്നേരം 5 മണി മുതലാണ് സന്ദർശകരെ സ്വാഗതം ചെയ്യുകയെന്ന് അധികൃതർ അറിയിച്ചു. മേഖലയിൽ വെടിനിർത്തൽ പ്രഖ്യാപിച്ചതിന് പിന്നാലെ ഗ്ലോബൽ വില്ലേജ് തുറക്കുമെന്ന വാർത്ത വലിയ ആവേശത്തോടെയാണ് യുഎഇ നിവാസികൾ സ്വീകരിച്ചത്.

പ്രതിദിനം വൈകുന്നേരം 5 മണി മുതൽ അർധരാത്രി 12 മണി വരെയാണ് പ്രവർത്തന സമയം. ഓൺലൈൻ വഴിയോ മൊബൈൽ ആപ്പ് വഴിയോ ടിക്കറ്റുകൾ ബുക്ക് ചെയ്യാം. കൂടാതെ കവാടങ്ങളിലും ടിക്കറ്റുകൾ ലഭ്യമാകും. 25 ദിർഹം മുതലാണ് ടിക്കറ്റ് നിരക്ക് ആരംഭിക്കുന്നത്. മെയ് 10-ന് സീസൺ അവസാനിക്കാനിരിക്കെ, നിലവിലെ സാഹചര്യം കണക്കിലെടുത്ത് പ്രവർത്തന കാലാവധി നീട്ടുമോ എന്ന കാര്യത്തിൽ അധികൃതർ വ്യക്തത വരുത്തിയിട്ടില്ല. 90-ലധികം രാജ്യങ്ങളുടെ സംസ്കാരം വിളിച്ചോതുന്ന 30 പവിലിയനുകളും 3,500 ഷോപ്പിംഗ് ഔട്ട്ലെറ്റുകളുമാണ് ഈ മുപ്പതാം സീസണിന്റെ പ്രത്യേകത.

യുദ്ധഭീതിയെത്തുടർന്ന് അടച്ചിട്ടെങ്കിലും സന്ദർശകരുമായുള്ള ബന്ധം ഗ്ലോബൽ വില്ലേജ് നിലനിർത്തിയിരുന്നു. ഈ സീസൺ ഇനി തുറക്കില്ലെന്ന് ആശങ്കപ്പെട്ട ഒരു ആരാധികയ്ക്ക്, അവൾ വാങ്ങാൻ ആഗ്രഹിച്ചിരുന്ന എമിറാത്തി വസ്ത്രമായ 'മുഖവാർ' (Mukhawar) സമ്മാനമായി നൽകി ഗ്ലോബൽ വില്ലേജ് അധികൃതർ നേരത്തെ വാർത്തകളിൽ ഇടംപിടിച്ചിരുന്നു. ബ്ലൂവാട്ടേഴ്സ് ഐലൻഡിലെ ഐൻ ദുബായ്, ദുബായ് പാർക്സ് ആൻഡ് റിസോർട്ട്സ് തുടങ്ങിയ വിനോദസഞ്ചാര കേന്ദ്രങ്ങളും വരും ദിവസങ്ങളിൽ തുറന്നു പ്രവർത്തിക്കുമെന്നാണ് റിപ്പോർട്ടുകൾ.