ജപ്പാനിൽ ഭൂചലനം; മരണം 13 ആയി, തിരച്ചിൽ തുടരുന്നു

ജപ്പാനിലെ കീഷു ദ്വീപിലെ കുമാമോത്തോയിൽ 6.8 തീവ്രത രേഖപ്പെടുത്തിയ ശക്തമായ ഭൂചലനത്തിൽ മരിച്ചവരുടെ എണ്ണം 13 ആയി. ഇന്നലെ ഉണ്ടായ ഭൂചലനത്തിൽ നിരവധി പേർക്ക് പരുക്കേൽക്കുകയും നിരവധി പേരെ കാണാതാകുകയും ചെയ്തിട്ടുണ്ട്. കാണാതായവർക്കായി തിരച്ചിൽ തുടരുകയാണ്.

ഭൂചലനത്തെത്തുടർന്നുണ്ടായ സ്‌ഫോടനത്തിൽ കഷീമ നഗരത്തിലെ ഒരു ഷോപ്പിങ് മാൾ രണ്ടായി പിളർന്നതായി റിപ്പോർട്ടുണ്ട്. മാളിനുള്ളിൽ നിരവധി പേർ കുടുങ്ങിക്കിടക്കുന്നതായാണ് വിവരം. നിപ്പോൺ പേപ്പർ ഫാക്ടറിയിലെ ചിമ്മിനി തകർന്നുവീണ് ഏതാനും പേരെ കാണാതായതായും അധികൃതർ അറിയിച്ചു.

രക്ഷാപ്രവർത്തനത്തിനായി സൈന്യത്തെ വിന്യസിച്ചിട്ടുണ്ട്. കുമാമോത്തോയിൽ നിരവധി കെട്ടിടങ്ങൾ, പാലങ്ങൾ, റോഡുകൾ എന്നിവയ്ക്ക് വ്യാപക നാശനഷ്ടമുണ്ടായി. മുൻകരുതലിന്റെ ഭാഗമായി മൂന്ന് ലക്ഷത്തോളം പേരെ സുരക്ഷിത കേന്ദ്രങ്ങളിലേക്ക് മാറ്റിപ്പാർപ്പിച്ചു. ഭൂചലനത്തെ തുടർന്ന് പുറപ്പെടുവിച്ച സുനാമി മുന്നറിയിപ്പ് പിന്നീട് പിൻവലിച്ചു. നഗരത്തിന് തെക്ക് 20 കിലോമീറ്റർ അകലെയായിരുന്നു ഭൂചലനത്തിന്റെ പ്രഭവകേന്ദ്രം.

ടോക്കിയോയിൽ നിന്ന് ഏകദേശം 900 കിലോമീറ്റർ അകലെയുള്ള കുമാമോത്തോ കീഷു ദ്വീപിലെ പ്രധാന നഗരങ്ങളിലൊന്നാണ്. കഴിഞ്ഞ ഒരാഴ്ചയായി പ്രദേശത്ത് നേരിയ പ്രകമ്പനങ്ങൾ അനുഭവപ്പെട്ടിരുന്നതിനാൽ ഭൂചലന മുന്നറിയിപ്പ് നിലവിലുണ്ടായിരുന്നു. 2016-ൽ കുമാമോത്തോയെ വിറപ്പിച്ച ഭൂചലനത്തിൽ 275 പേർ മരിക്കുകയും 2,739 പേർക്ക് പരുക്കേൽക്കുകയും ചെയ്തിരുന്നു.