ഡി.ആർ. കോംഗോയിൽ എബോള വ്യാപനം രൂക്ഷം; മരണസംഖ്യ 1700 കടന്നു

ഡെമോക്രാറ്റിക് റിപ്പബ്ലിക് ഓഫ് കോംഗോയിൽ (DR Congo) എബോള ബാധിച്ച് മരിച്ചവരുടെ എണ്ണം 1700 കടന്നതായി ആഫ്രിക്ക സെന്റർസ് ഫോർ ഡിസീസ് കൺട്രോൾ ആൻഡ് പ്രിവൻഷൻ വ്യക്തമാക്കുന്നു. എബോളയുടെ 'ബൂൻഡിബുഗ്യോ' വകഭേദം മൂലമുണ്ടായ രോഗബാധയിൽ ഇതിനകം 1707 പേർ മരിക്കുകയും 3802 പേരിൽ രോഗം സ്ഥിരീകരിക്കുകയും ചെയ്തിട്ടുണ്ട്. ചരിത്രത്തിലെ രണ്ടാമത്തെ വലിയ എബോള വ്യാപനമാണിത്.

വളരെ വേഗത്തിൽ പടരുന്ന ബൂൻഡിബുഗ്യോ വകഭേദത്തിനെതിരെ അംഗീകൃത വാക്സിനുകളോ ചികിത്സകളോ നിലവിലില്ല എന്നത് പ്രതിസന്ധിയുടെ ആഘാതം കൂട്ടുന്നു. രോഗവ്യാപനം കൂടുതലായുള്ള ഇത്തൂരി പ്രവിശ്യയിൽ നിന്നാണ് 90 ശതമാനം കേസുകളും റിപ്പോർട്ട് ചെയ്തിരിക്കുന്നത്.

നൂറിലേറെ ആരോഗ്യപ്രവർത്തകർക്കും രോഗം ബാധിച്ചിട്ടുണ്ട്. വായുവിലൂടെയോ വെള്ളത്തിലൂടെയോ പടരാത്ത ഈ രോഗം, സ്രവങ്ങളിലൂടെയും ശരിയായി പാകം ചെയ്യാത്ത മാംസത്തിലൂടെയുമാണ് മനുഷ്യരിലേക്ക് എത്തുന്നത്. ലക്ഷണങ്ങൾ വൈകി റിപ്പോർട്ട് ചെയ്യുന്നതാണ് മരണനിരക്ക് ഉയരാൻ പ്രധാന കാരണമാകുന്നത്.