എൽ നിനോ പ്രതിഭാസം: യു.എ.ഇയിൽ കൂടുതൽ മഴ ലഭിക്കാൻ സാധ്യതയെന്ന് എൻ.സി.എം

ശക്തമായ 'എൽ നിനോ' (El Niño) പ്രതിഭാസത്തിന്റെ സ്വാധീനം കാരണം യു.എ.ഇയിൽ സാധാരണ ലഭിക്കുന്നതിനേക്കാൾ കൂടുതൽ മഴ ലഭിക്കാൻ സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം (NCM) അറിയിച്ചു. പസഫിക് സമുദ്രത്തിൽ രൂപപ്പെടുന്ന ഈ കാലാവസ്ഥാ വ്യതിയാനത്തിന്റെ നേരിട്ടുള്ള ആഘാതം പസഫിക് മേഖലയിലാണെങ്കിലും യു.എ.ഇ ഉൾപ്പെടെയുള്ള ലോകത്തിന്റെ വിവിധ ഭാഗങ്ങളിൽ ഇത് പരോക്ഷമായ മാറ്റങ്ങൾക്ക് കാരണമാകുന്നുണ്ട്.

പസഫിക് സമുദ്രത്തിലെ താപനില വ്യതിയാനം കാരണം ലോകത്തിലെ ചില പ്രദേശങ്ങളിൽ വരൾച്ചയ്ക്കും മറ്റു ചിലയിടങ്ങളിൽ അതിശക്തമായ മഴയ്ക്കും എൽ നിനോ വഴിതെളിക്കാറുണ്ട്. നിലവിലെ റിപ്പോർട്ടുകൾ പ്രകാരം കൂടുതൽ മഴ ലഭിക്കാൻ സാധ്യതയുള്ള രാജ്യങ്ങളുടെ പട്ടികയിലാണ് യു.എ.ഇ ഉള്ളത്. അന്തരീക്ഷത്തിൽ ആവശ്യത്തിന് ഈർപ്പം രൂപപ്പെടുന്ന ഘട്ടങ്ങളിൽ മഴയുടെ അളവ് വർധിക്കാൻ ഈ പ്രതിഭാസം അനുകൂലമായ അന്തരീക്ഷമൊരുക്കും.

അതേസമയം, നിലവിൽ രാജ്യത്തെ കാലാവസ്ഥാ സ്ഥിതിഗതികൾ പൂർണമായും ശാന്തവും സുരക്ഷിതവുമാണെന്നും ജനങ്ങൾ ആശങ്കപ്പെടേണ്ട സാഹചര്യമില്ലെന്നും അധികൃതർ വ്യക്തമാക്കി. കാലാവസ്ഥാ വ്യതിയാനങ്ങൾ 24 മണിക്കൂറും നിരീക്ഷിച്ചു വരികയാണ്. വ്യാജ വാർത്തകളും അഭ്യൂഹങ്ങളും പ്രചരിപ്പിക്കരുതെന്നും കാലാവസ്ഥയുമായി ബന്ധപ്പെട്ട കൃത്യമായ വിവരങ്ങൾക്ക് ഔദ്യോഗിക അറിയിപ്പുകളെ മാത്രം ആശ്രയിക്കണമെന്നും എൻ.സി.എം അഭ്യർഥിച്ചു.