എത്തിഹാദ് റെയിൽ: ആദ്യഘട്ടം 2026-ൽ; അബുദാബി, ദുബായ്, ഫുജൈറ നഗരങ്ങൾ ബന്ധിപ്പിക്കും

യുഎഇയുടെ സ്വപ്ന പദ്ധതിയായ എത്തിഹാദ് റെയിലിന്റെ പാസഞ്ചർ സർവീസുകൾ ആസൂത്രണം ചെയ്തതുപോലെ 2026-ൽ ആരംഭിക്കുമെന്ന് ഔദ്യോഗിക സ്ഥിരീകരണം. വിവിധ ഘട്ടങ്ങളിലായാണ് സർവീസുകൾ സജ്ജമാക്കുന്നത്. ആദ്യഘട്ടത്തിൽ അബുദാബിയെയും ദുബായിയെയും ബന്ധിപ്പിക്കുകയും തുടർന്ന് കിഴക്കൻ തീരത്തെ ഫുജൈറയിലേക്ക് സർവീസ് വ്യാപിപ്പിക്കുകയും ചെയ്യുമെന്ന് എത്തിഹാദ് റെയിൽ പബ്ലിക് പോളിസി ആൻഡ് സസ്റ്റൈനബിലിറ്റി ഡയറക്ടർ അദ്ര അൽ മൻസൂരി അറിയിച്ചു.

ജനസാന്ദ്രത, യാത്രാ ആവശ്യകത, എമിറേറ്റുകൾ തമ്മിലുള്ള ബന്ധിപ്പിക്കൽ മുൻഗണനകൾ എന്നിവ കണക്കിലെടുത്താണ് പ്രാരംഭ റൂട്ടുകൾ നിശ്ചയിച്ചിരിക്കുന്നത്. 2030-ഓടെ പ്രതിവർഷം ഏകദേശം 3.65 കോടി യാത്രക്കാരെ ഉൾക്കൊള്ളാൻ ഈ റെയിൽ ശൃംഖലയ്ക്ക് സാധിക്കുമെന്ന് പ്രതീക്ഷിക്കുന്നു.

പ്രധാന സ്റ്റേഷനുകളും കണക്റ്റിവിറ്റിയും: നേരത്തെ പ്രഖ്യാപിച്ച 11 പ്രധാന സ്റ്റേഷനുകളിൽ അൽ സില, അൽ മിർഫ, മദീനത്ത് സായിദ്, മുഹമ്മദ് ബിൻ സായിദ് സിറ്റി, ജുമൈറ ഗോൾഫ് എസ്റ്റേറ്റ്സ്, ഷാർജ യൂണിവേഴ്സിറ്റി സിറ്റി, ഫുജൈറയിലെ സക്കാംകം തുടങ്ങിയവ ഉൾപ്പെടുന്നു. ജനവാസ കേന്ദ്രങ്ങളെയും പ്രധാന നഗരങ്ങളെയും കേന്ദ്രീകരിച്ചാണ് സ്റ്റേഷനുകൾ തിരഞ്ഞെടുത്തിരിക്കുന്നത്. ദുബായ് മെട്രോയുടെ റെഡ് ലൈനും പുതുതായി വരുന്ന ഗോൾഡ് ലൈനും ജുമൈറ ഗോൾഫ് എസ്റ്റേറ്റിൽ വെച്ച് എത്തിഹാദ് റെയിലുമായി സംഗമിക്കും. കൂടാതെ അൽ മെയ്ദാനിലും ഭാവിയിൽ മെട്രോയുമായി ബന്ധിപ്പിക്കാൻ സാധ്യതയുള്ള സ്റ്റേഷൻ മാപ്പിൽ അടയാളപ്പെടുത്തിയിട്ടുണ്ട്.

യാത്രാ സൗകര്യങ്ങൾ: പദ്ധതിക്കായി നീക്കിവച്ചിട്ടുള്ള 13 ട്രെയിനുകളിൽ പത്തെണ്ണം ഇതിനകം യുഎഇയിൽ എത്തിച്ചേർന്നു. അന്താരാഷ്ട്ര ഗുണനിലവാരവും സുരക്ഷാ പരിശോധനകളും പൂർത്തിയാക്കിയ ഈ ട്രെയിനുകളിൽ ഓരോന്നിനും 400 യാത്രക്കാരെ ഒരേസമയം വഹിക്കാൻ ശേഷിയുണ്ട്. നൂതനമായ ഡിസൈൻ, വൈഫൈ സൗകര്യം, എല്ലാ സീറ്റുകളിലും ചാർജിംഗ് പോയിന്റുകൾ എന്നിവ ട്രെയിനുകളുടെ പ്രത്യേകതയാണ്.

ലോകത്തിലെ പ്രമുഖ ട്രാൻസ്പോർട്ട് കമ്പനിയായ 'കിയോളിസുമായി' (Keolis) ചേർന്നാണ് പാസഞ്ചർ സർവീസുകൾ പ്രവർത്തിപ്പിക്കുന്നത്. റെയിൽ യാത്രയ്ക്ക് പുറമെ ബസ്, ടാക്സി തുടങ്ങിയ സൗകര്യങ്ങളും സംയോജിപ്പിച്ചുകൊണ്ട് യാത്രക്കാർക്ക് സുഗമമായ യാത്ര ഉറപ്പാക്കാൻ കമ്പനി ലക്ഷ്യമിടുന്നു.