യു.എ.ഇയിൽ ഇത്തിഹാദ് റെയിൽ തരംഗം; ബുക്കിങ് തുടങ്ങി 48 മണിക്കൂറിനുള്ളിൽ 5,000 ടിക്കറ്റുകൾ വിറ്റുതീർന്നു

യു.എ.ഇയുടെ സ്വപ്ന പദ്ധതിയായ ഇത്തിഹാദ് റെയിലിന്റെ പാസഞ്ചർ സർവീസുകൾക്ക് രാജ്യാന്തര തലത്തിൽ വൻ വരവേൽപ്പ്. യാത്രാ സർവീസുകൾക്കായുള്ള ടിക്കറ്റ് ബുക്കിങ് ആരംഭിച്ച് വെറും 48 മണിക്കൂറിനുള്ളിൽ അയ്യായിരത്തിലധികം (5,000) ടിക്കറ്റുകളാണ് വിറ്റുതീർന്നത്. ഇതോടെ ഇത്തിഹാദ് റെയിലിന്റെ ഒഫീഷ്യൽ മൊബൈൽ ആപ്ലിക്കേഷൻ യു.എ.ഇയിൽ ഏറ്റവും കൂടുതൽ ഡൗൺലോഡ് ചെയ്യപ്പെട്ട ഒന്നാം നമ്പർ സൗജന്യ ആപ്പായി മാറുകയും ചെയ്തു.

വരുന്ന ജൂൺ 30-ന് അബുദാബിക്കും ഫുജൈറയ്ക്കും ഇടയിൽ ആരംഭിക്കുന്ന ആദ്യഘട്ട സർവീസുകൾക്ക് മുന്നോടിയായാണ് ഈ അഭൂതപൂർവ്വമായ തിരക്ക്. ഒരു മണിക്കൂറും 45 മിനിറ്റുമെടുക്കുന്ന ഈ ആദ്യ സർവീസിന്റെ ഉദ്ഘാടന ദിനത്തിലെ എല്ലാ ടിക്കറ്റുകളും ബുക്കിങ് തുടങ്ങി നിമിഷങ്ങൾക്കകം തന്നെ വിറ്റുപോയിരുന്നു. തുടർന്ന് സെപ്റ്റംബർ 30-ഓടെ അബുദാബി, ദുബായ്, അൽ ദൈദ്, ഫുജൈറ എന്നീ നഗരങ്ങളെ ബന്ധിപ്പിച്ചുള്ള പ്രധാന ശൃംഖലയുടെ ഔദ്യോഗിക ഉദ്ഘാടനം നടക്കും. തുടർന്ന് ഷാർജയിലേക്കും അൽ ദഫ്‌റയിലേക്കും സർവീസുകൾ നീട്ടും. രാജ്യത്തെ 11 പ്രധാന നഗരങ്ങളെ കോർത്തിണക്കുന്ന ഈ റെയിൽ ശൃംഖലയ്ക്ക് 900 കിലോമീറ്റർ നീളമാണുള്ളത്.

അബുദാബി - ഫുജൈറ റൂട്ടിൽ കംഫർട്ട് ക്ലാസിന് 55 ദിർഹവും പ്രീമിയം ക്ലാസിന് 120 ദിർഹവുമാണ് ടിക്കറ്റ് നിരക്ക്. കംഫർട്ട് ക്ലാസിൽ വൈഫൈ, പവർ ഔട്ട്‌ലെറ്റുകൾ, ലഗേജ് സ്പേസ് എന്നിവ ലഭ്യമാകുമ്പോൾ, പ്രീമിയം ക്ലാസിൽ വിശാലമായ സീറ്റുകൾക്കൊപ്പം സൗജന്യ ലഘുഭക്ഷണങ്ങളും പാനീയങ്ങളും ഒരുക്കിയിട്ടുണ്ട്. പുതിയ ട്രെയിൻ സ്റ്റേഷനുകളിലും ട്രെയിനുകൾക്കുള്ളിലും റസ്റ്റോറന്റുകളും കഫേകളും അടക്കമുള്ള അത്യാധുനിക സൗകര്യങ്ങളുണ്ടാകും. ട്രാവൽ ഏജൻസികൾക്കും കോർപ്പറേറ്റുകൾക്കും സ്കൂളുകൾക്കും വലിയ ഗ്രൂപ്പുകൾക്കുമായി പ്രത്യേക ബുക്കിങ് സംവിധാനവും ഒരുക്കിയിട്ടുണ്ട്. കടുത്ത ഭൂപ്രകൃതിയുള്ള അബുദാബി - ഫുജൈറ റൂട്ട് ടൂറിസം മേഖലയ്ക്ക് വലിയ ഉണർവ് നൽകുമെന്നും സെപ്റ്റംബറിൽ ആരംഭിക്കുന്ന ദുബായ് റൂട്ട് ബിസിനസ്സ് യാത്രക്കാരെ ലക്ഷ്യമിട്ടുള്ളതാണെന്നും ഇത്തിഹാദ് റെയിൽ അധികൃതർ വ്യക്തമാക്കി. കുട്ടികൾക്കും മുതിർന്ന പൗരന്മാർക്കും നിലവിലുള്ള ഇളവുകൾക്ക് പുറമെ, സ്ഥിരം യാത്രികർക്കും വിദ്യാർത്ഥികൾക്കുമായി ഭാവിയിൽ കൂടുതൽ ആനുകൂല്യങ്ങൾ കൊണ്ടുവരുമെന്നും കമ്പനി സൂചന നൽകിയിട്ടുണ്ട്.