ദുബൈ റൺ 2026-ന് ആവേശകരമായ സമാപനം; ഷെയ്ഖ് സായിദ് റോഡ് ഗതാഗതത്തിനായി പൂർണ്ണമായും തുറന്നു
ഈ വർഷത്തെ ദുബൈ റൺ ഔദ്യോഗികമായി സമാപിച്ചതോടെ നഗരത്തിലെ പ്രധാന പാതയായ ഷെയ്ഖ് സായിദ് റോഡ് വാഹന ഗതാഗതത്തിനായി പൂർണ്ണമായും തുറന്നുകൊടുത്തു. മത്സരത്തിന് മുന്നോടിയായി പുലർച്ചെ തന്നെ വലിയ ജനക്കൂട്ടമാണ് വേദിയിലേക്ക് ഒഴുകിയെത്തിയത്. ഓട്ടം തുടങ്ങുന്നതിന് മുൻപ് കാത്തുനിന്ന കായികതാരങ്ങൾക്ക് ആവേശം പകരാൻ ആകാശത്ത് വിസ്മയകരമായ എയരിയൽ ഡിസ്പ്ലേകളും ഒരുക്കിയിരുന്നു. കർശനമായ സുരക്ഷാ പരിശോധനകൾക്ക് ശേഷം രാവിലെ 6.38-നാണ് ദുബൈ റൺ 2026-ന് ഔദ്യോഗികമായി തുടക്കമായത്.
സൂര്യോദയത്തോടെ ആയിരക്കണക്കിന് ഓട്ടക്കാർ അണിനിരന്നതോടെ ഷെയ്ഖ് സായിദ് റോഡ് അക്ഷരാർത്ഥത്തിൽ ജനസാഗരമായി മാറി. വർണ്ണാഭമായ ഇൻഫ്ലേറ്റബിൾ വേഷങ്ങളും പാട്ടും നൃത്തവുമെല്ലാമായി വലിയൊരു ഉത്സവാന്തരീക്ഷമാണ് ഓട്ടത്തിലുടനീളം പ്രകടമായത്. ഓട്ടക്കാർ ഫിനിഷ് ലൈനിലേക്ക് എത്തിയതിന് പിന്നാലെ തന്നെ റോഡ് ഗതാഗതത്തിനായി തുറന്നുകൊടുക്കാനുള്ള മുന്നൊരുക്കങ്ങൾ അധികൃതർ ആരംഭിച്ചിരുന്നു.
പരിപാടി അവസാനിച്ചതോടെ സുരക്ഷാ ഉദ്യോഗസ്ഥർ റോഡുകളിൽ പരിശോധന നടത്തുകയും ബാരിക്കേഡുകൾ പൂർണ്ണമായും നീക്കം ചെയ്യുകയും ചെയ്തു. ഇതോടെ ഷെയ്ഖ് സായിദ് റോഡിലൂടെയുള്ള വാഹന ഗതാഗതം സാധാരണ നിലയിലേക്ക് പുനഃസ്ഥാപിക്കപ്പെട്ടു.