ദുബായിൽ ഷെയർ ടാക്സി സർവീസ് വിപുലീകരിക്കുന്നു

ദുബായിൽ വൻ വിജയമായ ഷെയർ ടാക്സി സർവീസ് കൂടുതൽ പ്രധാന സ്ഥലങ്ങളിലേക്ക് വ്യാപിപ്പിക്കാൻ ദുബൈ റോഡ് ഗതാഗത അതോറിറ്റി (ആർ.ടി.എ.) തീരുമാനിച്ചു. ആൽ മക്തൂം അന്താരാഷ്ട്ര വിമാനത്താവളം, ദുബൈ വേൾഡ് ട്രേഡ് സെന്റർ എന്നീ രണ്ട് പ്രധാന കേന്ദ്രങ്ങളിലേക്കാണ് പുതിയ സർവീസുകൾ ഉടൻ ആരംഭിക്കുക. ഇതിന്റെ മുന്നോടിയായി ആറു മാസത്തെ പരീക്ഷണ ഓട്ടം ഉടൻ തുടങ്ങും.

പുതിയ റൂട്ടുകൾ

• ആൽ മക്തൂം അന്താരാഷ്ട്ര വിമാനത്താവളം റൂട്ട്: ദുബൈ മറീന മാൾ, ബിസിനസ് ബേ മെട്രോ സ്റ്റേഷൻ, പാം ജുമൈറ അറ്റ്ലാന്റിസ് മെട്രോ സ്റ്റേഷൻ എന്നിവിടങ്ങൾ ഉൾപ്പെടുന്നതാണ് ഈ റൂട്ട്.
• ദുബൈ വേൾഡ് ട്രേഡ് സെന്റർ റൂട്ട്: ബിസിനസ് ബേ മെട്രോ സ്റ്റേഷൻ, അൽ സത്‌വ ബസ് സ്റ്റേഷൻ, ദുബൈ മറീന മാൾ എന്നിവയാണ് ഈ റൂട്ടിൽ ഉൾപ്പെടുന്നത്.

കഴിഞ്ഞ വർഷമാണ് ആർ.ടി.എ. ഷെയർ ടാക്സി സർവീസിന് തുടക്കമിട്ടത്. ദുബൈയിലെ ഇബ്ൻ ബത്തൂത്ത മാളിൽ നിന്ന് അബൂദബിയിലെ അൽ വഹ്ദ മാളിലേക്കായിരുന്നു ആദ്യ സർവീസ്. മിതമായ നിരക്കിൽ വേഗമേറിയ യാത്ര സാധ്യമാകുന്ന ഈ പദ്ധതിക്ക് സമൂഹത്തിൽ വലിയ സ്വീകാര്യത ലഭിച്ചു. കഴിഞ്ഞ ഒരു വർഷത്തിനിടെ ഈ റൂട്ടിൽ ഷെയർ ടാക്സി ഉപയോഗിച്ചവരുടെ എണ്ണത്തിൽ 228 ശതമാനം വർധനവുണ്ടായെന്ന് ആർ.ടി.എയുടെ പ്ലാനിങ് ആൻഡ് ബിസിനസ് ഡെവലപ്‌മെന്റ് ഡയറക്ടർ ആദിൽ ശാക്കിരി അറിയിച്ചു.