ട്രാഫിക് പിഴയെന്ന പേരിൽ വ്യാജ ഇമെയിൽ; താമസക്കാർക്ക് മുന്നറിയിപ്പുമായി റോയൽ ഒമാൻ പൊലീസ്

ഒമാനിൽ ട്രാഫിക് പിഴകൾ അടക്കാനുണ്ടെന്ന് കാണിച്ച് താമസക്കാരെ ലക്ഷ്യമിട്ട് പ്രചരിക്കുന്ന വ്യാജ ഇമെയിലുകൾക്കെതിരെ റോയൽ ഒമാൻ പൊലീസ് (ROP) കർശന മുന്നറിയിപ്പ് നൽകി. ഔദ്യോഗിക ട്രാഫിക് അധികൃതരുടെ പേരിൽ വരുന്ന ഇത്തരം സന്ദേശങ്ങളിലെ സംശയാസ്പദമായ ലിങ്കുകളിൽ ക്ലിക്ക് ചെയ്യുകയോ ബാങ്കിങ് വിവരങ്ങൾ പങ്കുവെക്കുകയോ ചെയ്യരുതെന്ന് അധികൃതർ ജനങ്ങളോട് ആവശ്യപ്പെട്ടു.

ഔദ്യോഗിക സംവിധാനങ്ങളെയും ലോഗോകളെയും കൃത്യമായി അനുകരിച്ചാണ് തട്ടിപ്പുകാർ ഇമെയിലുകൾ അയക്കുന്നത്. പിഴയടക്കാനെന്ന പേരിൽ നൽകിയിരിക്കുന്ന വ്യാജ ലിങ്കുകളിൽ ക്ലിക്ക് ചെയ്യുന്നതോടെ ഉപയോക്താക്കളുടെ വ്യക്തിഗത വിവരങ്ങളും ബാങ്ക് അക്കൗണ്ട് വിവരങ്ങളും ക്രെഡിറ്റ്/ഡെബിറ്റ് കാർഡ് വിവരങ്ങളും തട്ടിപ്പുകാർ ചോർത്തുകയാണ് ചെയ്യുന്നത്.

അപരിചിതമായ ഇമെയിലുകളിലെ ലിങ്കുകൾ തുറക്കരുതെന്നും സംശയാസ്പദമായ അറ്റാച്ച്മെന്റുകൾ ഒന്നിപ്പിച്ചു ഡൗൺലോഡ് ചെയ്യരുതെന്നും പൊലീസ് കർശന നിർദ്ദേശം നൽകി. ഔദ്യോഗികമല്ലാത്ത പ്ലാറ്റ്‌ഫോമുകളിലൂടെയോ ലിങ്കുകളിലൂടെയോ ബാങ്ക് ഒ.ടി.പി ഉൾപ്പെടെയുള്ള രഹസ്യ വിവരങ്ങൾ കൈമാറരുത്. ഇത്തരം സൈബർ തട്ടിപ്പ് ശ്രമങ്ങൾ ശ്രദ്ധയിൽപ്പെട്ടാൽ ഉടൻ തന്നെ റോയൽ ഒമാൻ പൊലീസിന്റെ സൈബർ വിങ്ങിലോ ബന്ധപ്പെട്ട മറ്റ് അധികൃതർക്കോ റിപ്പോർട്ട് ചെയ്യണമെന്നും ആർ.ഒ.പി ഓർമ്മിപ്പിച്ചു.