കുവൈത്തിൽ വിമാന സർവ്വീസുകൾ സാധാരണ നിലയിലേക്ക്; എയർ ഇന്ത്യ എക്സ്പ്രസ് ഉൾപ്പെടെയുള്ള വിദേശ വിമാനങ്ങൾ ഇന്ന് മുതൽ എത്തും

മാസങ്ങൾ നീണ്ട വലിയൊരു ഇടവേളയ്ക്ക് ശേഷം കുവൈത്ത് അന്താരാഷ്ട്ര വിമാനത്താവളത്തിൽ നിന്നുള്ള വിദേശ വിമാന സർവ്വീസുകൾ സാധാരണ നിലയിലേക്ക് മടങ്ങുന്നു. കുവൈത്ത് എയർവേസ്, ജസീറ എയർവേസ് എന്നിവയ്ക്ക് പുറമെ എയർ ഇന്ത്യ എക്സ്പ്രസ് അടക്കമുള്ള വിദേശ വിമാനക്കമ്പനികൾ ഇന്ന് (ജൂൺ 1, തിങ്കളാഴ്ച) മുതൽ കുവൈത്തിലേക്ക് സർവ്വീസുകൾ പുനരാരംഭിക്കും. കേരളത്തിലേക്കുള്ള സർവ്വീസുകൾ ഉൾപ്പെടെ ഇതോടെ സജീവമാകും.

വ്യോമപാത അടച്ചതു മുതൽ സർവ്വീസുകൾ പുനരാരംഭിക്കുന്നത് വരെ

യു.എസ് - ഇറാൻ സംഘർഷ പശ്ചാത്തലത്തിൽ കഴിഞ്ഞ ഫെബ്രുവരി 28-നാണ് കുവൈത്ത് വിമാനത്താവളവും രാജ്യത്തിന്റെ വ്യോമപാതയും പൂർണ്ണമായും അടച്ചത്. ഇതോടെയാണ് വിദേശ വിമാനങ്ങളുടെ സർവ്വീസുകൾ പൂർണ്ണമായി നിലച്ചത്. ആ സമയത്ത് കുവൈത്തിലേക്കും തിരിച്ചുമുള്ള യാത്രക്കാർ സൗദി അറേബ്യയിലെ ദമ്മാം, ഖൈസുമ വിമാനത്താവളങ്ങൾ വഴിയാണ് യാത്ര ചെയ്തിരുന്നത്.

പിന്നീട് സാഹചര്യം മെച്ചപ്പെട്ടതിനെ തുടർന്ന് ഏപ്രിൽ അഞ്ച് മുതൽ ടെർമിനൽ-4ൽ നിന്ന് കുവൈത്ത് എയർവേസും ടെർമിനൽ-5ൽ നിന്ന് ജസീറ എയർവേസും സർവ്വീസുകൾ ഭാഗികമായി ആരംഭിച്ചിരുന്നു. എന്നാൽ, സാധാരണക്കാർ ഭൂരിഭാഗവും ആശ്രയിക്കുന്ന ടെർമിനൽ-1ൽ നിന്നുള്ള വിദേശ വിമാനക്കമ്പനികളുടെ സർവ്വീസുകൾ ആരംഭിക്കാതിരുന്നത് പ്രവാസികൾക്ക് വലിയ യാത്രാ പ്രയാസങ്ങളാണ് സൃഷ്ടിച്ചിരുന്നത്.

സർവ്വീസുകൾ ഘട്ടം ഘട്ടമായി മാത്രം; ബുക്കിങ് ആരംഭിച്ചു

തിങ്കളാഴ്ച മുതൽ ടെർമിനൽ ഒന്നിൽ നിന്നുള്ള വിമാനസർവ്വീസുകൾ പുനരാരംഭിക്കുമെന്ന് കുവൈത്ത് ജനറൽ സിവിൽ ഏവിയേഷൻ അതോറിറ്റി (DGCA) നേരത്തെ തന്നെ വ്യക്തമാക്കിയിരുന്നു. സുരക്ഷിതമായ യാത്ര ഉറപ്പാക്കുന്നതിനായി സിവിൽ ഏവിയേഷൻ അതോറിറ്റി വിമാനത്താവളത്തിൽ എല്ലാവിധ സജ്ജീകരണങ്ങളും പൂർത്തിയാക്കിയിട്ടുണ്ട്.

തുടക്കത്തിൽ ഘട്ടം ഘട്ടമായിട്ടായിരിക്കും സർവ്വീസുകൾ പുനരാരംഭിക്കുക. ആദ്യ ഘട്ടത്തിൽ കുറഞ്ഞ സർവ്വീസുകൾ മാത്രമേ ഉണ്ടാകൂ എങ്കിലും വൈകാതെ തന്നെ ഇവയുടെ എണ്ണം വർദ്ധിപ്പിക്കും. വിവിധ വിമാനക്കമ്പനികൾ ഇതിനോടകം തന്നെ ടിക്കറ്റ് റിസർവേഷൻ നടപടികൾ ആരംഭിച്ചിട്ടുണ്ട്.