ഗുരുതര രോഗബാധിതർക്ക് അസിസ്റ്റഡ് ഡൈയിങ് നിയമവിധേയമാക്കി ഫ്രാൻസ്

ഭേദമാക്കാനാകാത്ത ഗുരുതര രോഗങ്ങളാൽ ബുദ്ധിമുട്ടുന്ന പ്രായപൂർത്തിയായവർക്ക് കർശന വ്യവസ്ഥകളോടെ ഡോക്ടറുടെ സഹായത്തോടെയുള്ള മരണം (Assisted Dying) അനുവദിക്കുന്ന ബില്ലിന് ഫ്രഞ്ച് ദേശീയ അസംബ്ലി അന്തിമ അംഗീകാരം നൽകി. പ്രസിഡന്റ് ഇമ്മാനുവൽ മാക്രോൺ 2023-ൽ പ്രഖ്യാപിച്ച ദയാവധത്തിന് അനുകൂലമായ നിയമനിർമ്മാണത്തിന്റെ പ്രധാന ഭാഗമാണിത്. സെനറ്റ് ബിൽ തള്ളിയെങ്കിലും ഫ്രഞ്ച് ഭരണഘടന പ്രകാരം ദേശീയ അസംബ്ലിക്കാണ് വിഷയത്തിൽ അന്തിമ തീരുമാനമെടുക്കാനുള്ള അധികാരം. നിയമം പ്രാബല്യത്തിൽ വരുന്നതിന് മുൻപായി ഇനി ഭരണഘടനാ സമിതിയുടെ പരിശോധന കൂടി പൂർത്തിയാകേണ്ടതുണ്ട്.

പുതിയ നിയമത്തിലെ പ്രധാന വ്യവസ്ഥകൾ:

• 18 വയസ്സ് പൂർത്തിയായ ഫ്രഞ്ച് പൗരന്മാർക്കും രാജ്യത്ത് നിയമപരമായി താമസിക്കുന്നവർക്കുമാണ് ഈ അനുമതിയുള്ളത്.
• അപേക്ഷകൻ സ്വന്തം ഇഷ്ടപ്രകാരമായിരിക്കണം തീരുമാനമെടുക്കേണ്ടത്.
• ഗുരുതര മാനസിക രോഗമുള്ളവർക്കും അൽഷിമേഴ്‌സ് ബാധിതർക്കും ഈ നിയമത്തിന്റെ ആനുകൂല്യം ലഭിക്കില്ല.
• രോഗി അപേക്ഷ സമർപ്പിച്ചാൽ 15 ദിവസത്തിനകം ആരോഗ്യവിദഗ്ദ്ധർ പരിശോധന നടത്തി തീരുമാനമെടുക്കും.
• അനുമതി ലഭിച്ചാൽ ഡോക്ടറുടെയോ നഴ്സിന്റെയോ സാന്നിധ്യത്തിൽ വീട്ടിലോ ആരോഗ്യ കേന്ദ്രത്തിലോ വെച്ച് രോഗിക്ക് സ്വയം മരുന്ന് സ്വീകരിക്കാം. ഇതിന്റെ മുഴുവൻ ചെലവും ദേശീയ ആരോഗ്യ ഇൻഷുറൻസ് വഹിക്കും.

നിലവിലെ നിയമപ്രകാരം മരണാസന്നരായ രോഗികൾക്ക് വേദന കുറയ്ക്കാനായി 'ഡീപ്പ് സെഡേഷൻ' അനുവദിച്ചിരുന്നെങ്കിലും അസിസ്റ്റഡ് ഡൈയിങ്ങോ ദയാവധമോ ഫ്രാൻസിൽ നിയമവിധേയമായിരുന്നില്ല. ഇതിനാൽ മുൻപ് പലരും അയൽരാജ്യങ്ങളെ ആശ്രയിക്കേണ്ടി വന്നിരുന്നു. ഭൂരിഭാഗം ജനങ്ങളും പുതിയ നിയമത്തെ അനുകൂലിക്കുമ്പോൾ, പ്രായമായവരിലും ഭിന്നശേഷിക്കാരിലും ഇത് മാനസിക സമ്മർദ്ദം സൃഷ്ടിക്കുമെന്ന ആശങ്കയുമായി ഒരുവിഭാഗം സംഘടനകൾ രംഗത്തുണ്ട്.