ഒമാനിൽ ശക്തമായ മഴയ്ക്കും വെള്ളപ്പാച്ചിലിനും സാധ്യത; അതീവ ജാഗ്രതാനിർദ്ദേശം നൽകി അധികൃതർ

ഒമാനിൽ വരും ദിവസങ്ങളിൽ ശക്തമായ കാലാവസ്ഥാ വ്യതിയാനമുണ്ടാകുമെന്ന് ദേശീയ മൾട്ടി-ഹസാർഡ് എർലി വാർണിംഗ് സെന്റർ മുന്നറിയിപ്പ് നൽകി. രാജ്യത്ത് രൂപപ്പെട്ട ന്യൂനമർദ്ദത്തെ തുടർന്ന് വിവിധ ഗവർണറേറ്റുകളിൽ ഇടിയോടു കൂടിയ മഴ, ശക്തമായ കാറ്റ്, ചിലയിടങ്ങളിൽ മഞ്ഞുവീഴ്ച എന്നിവയ്ക്ക് സാധ്യതയുണ്ടെന്നാണ് പ്രവചനം. പെട്ടെന്നുള്ള വെള്ളപ്പാച്ചിൽ (വാദി), പൊടിക്കാറ്റ് എന്നിവയ്ക്കും സാധ്യതയുള്ളതിനാൽ പൊതുജനങ്ങൾ ജാഗ്രത പാലിക്കണമെന്ന് അധികൃതർ നിർദ്ദേശിച്ചു.

രണ്ട് ഘട്ടങ്ങളിലായാണ് കാലാവസ്ഥാ വ്യതിയാനം അനുഭവപ്പെടുക. ആദ്യഘട്ടമായ മാർച്ച് 20, 21 തീയതികളിൽ മുസന്ദം, അൽ ബുറൈമി, നോർത്ത് അൽ ബതിന, മസ്‌കറ്റ്, ഹജർ മലനിരകൾ, ദോഫാർ തീരപ്രദേശങ്ങൾ എന്നിവിടങ്ങളിൽ നേരിയതോ മിതമായതോ ആയ മഴ ലഭിക്കും. ഈ സമയത്ത് മണിക്കൂറിൽ 10 മുതൽ 25 നോട്ട് വരെ വേഗതയിൽ തെക്കുകിഴക്കൻ കാറ്റ് വീശാൻ സാധ്യതയുണ്ട്.

രണ്ടാം ഘട്ടമായ മാർച്ച് 22 മുതൽ 23 വരെ കാലാവസ്ഥാ വ്യതിയാനം കൂടുതൽ ശക്തമാകും. മുസന്ദം മുതൽ അൽ വുസ്തയും ദോഫാറും ഉൾപ്പെടെ രാജ്യത്തെ ഭൂരിഭാഗം പ്രദേശങ്ങളിലും ഇടിയോടു കൂടിയ കനത്ത മഴയ്ക്ക് സാധ്യതയുണ്ട്. മണിക്കൂറിൽ 83 കിലോമീറ്റർ വരെ വേഗതയിൽ ശക്തമായ കാറ്റ് വീശാനും ഇടിമിന്നലിനൊപ്പം മഞ്ഞുവീഴ്ചയ്ക്കും സാധ്യത പ്രവചിക്കപ്പെടുന്നു. താഴ്വരകളിലും വാദികളിലും പെട്ടെന്ന് വെള്ളപ്പൊക്കമുണ്ടാകാൻ സാധ്യതയുള്ളതിനാൽ അതീവ ജാഗ്രത വേണം. കടൽ താരതമ്യേന ശാന്തമായിരിക്കുമെങ്കിലും തിരമാലകൾ രണ്ട് മീറ്റർ വരെ ഉയരാൻ സാധ്യതയുള്ളതിനാൽ ഇടിമിന്നൽ സമയങ്ങളിൽ കടലിൽ പോകുന്നത് ഒഴിവാക്കണമെന്ന് സിവിൽ ഏവിയേഷൻ അതോറിറ്റി നിർദ്ദേശിച്ചു.

മാർച്ച് 30 വരെ രാജ്യത്തിന്റെ പല ഭാഗങ്ങളിലും ഇടവിട്ട് മഴ തുടരുമെന്നാണ് കാലാവസ്ഥാ നിരീക്ഷകർ നൽകുന്ന സൂചന. ഔദ്യോഗിക കാലാവസ്ഥാ ബുള്ളറ്റിനുകൾ നിരന്തരം ശ്രദ്ധിക്കണമെന്നും അനാവശ്യമായ യാത്രകൾ ഒഴിവാക്കണമെന്നും അധികൃതർ പൊതുജനങ്ങളോട് അഭ്യർത്ഥിച്ചു.