സൗദിയിൽ കനത്ത മഴ തുടരുന്നു; മക്ക ഉൾപ്പെടെ അഞ്ച് പ്രവിശ്യകളിൽ റെഡ് അലർട്ട്

സൗദി അറേബ്യയിലെ തെക്കുപടിഞ്ഞാറൻ മേഖലകളിൽ കനത്ത മഴയും പ്രതികൂല കാലാവസ്ഥയും തുടരുന്നു. ദേശീയ കാലാവസ്ഥാ കേന്ദ്രം (NCM) മക്ക, അസീർ, ജിസാൻ, തബൂക്ക്, അൽബാഹ എന്നീ അഞ്ച് പ്രവിശ്യകളിൽ റെഡ് അലർട്ട് പ്രഖ്യാപിച്ചിട്ടുണ്ട്. ശക്തമായ കാറ്റ്, ഇടിമിന്നൽ, ആലിപ്പഴ വർഷം, കാഴ്ചമങ്ങൽ എന്നിവയ്‌ക്കൊപ്പം താഴ്‌വരകളിൽ മലവെള്ളപ്പാച്ചിലിനും സാധ്യതയുള്ളതിനാൽ സിവിൽ ഡിഫൻസ് ജാഗ്രതാ നിർദ്ദേശം നൽകി.

മക്ക മേഖലയിലെ ത്വാഇഫ്, അദം, മൈസാൻ, ബനി യസീദ്, യലംലം, അൽഅർദിയാത്ത് തുടങ്ങിയ പ്രദേശങ്ങളിൽ കനത്ത മഴ പെയ്യുമെന്നാണ് മുന്നറിയിപ്പ്. കൂടാതെ മദീന, ഹാഇൽ, അൽജൗഫ്, നോർത്തേൺ ബോർഡേഴ്‌സ് എന്നിവിടങ്ങളിൽ ഇടത്തരം മഴയ്ക്കും, ഖസീം, കിഴക്കൻ പ്രവിശ്യ (ഈസ്റ്റേൺ പ്രൊവിൻസ്) എന്നിവിടങ്ങളിൽ നേരിയ മഴയ്ക്കും സാധ്യതയുണ്ട്. വഡി (താഴ്‌വരകൾ), അണക്കെട്ടുകൾ, വെള്ളക്കെട്ടുള്ള പ്രദേശങ്ങൾ എന്നിവിടങ്ങളിൽ നിന്ന് വിട്ടുനിൽക്കണമെന്നും സിവിൽ ഡിഫൻസിന്റെ സുരക്ഷാ നിർദ്ദേശങ്ങൾ കർശനമായി പാലിക്കണമെന്നും അധികൃതർ അഭ്യർത്ഥിച്ചു.