യു.എ.ഇയിൽ കനത്ത മഴ തുടരുന്നു; മലയോര മേഖലകളിൽ മിന്നൽ പ്രളയ മുന്നറിയിപ്പ്, വിവിധ എമിറേറ്റുകളിൽ യെല്ലോ അലർട്ട്

 

യു.എ.ഇയുടെ വിവിധ ഭാഗങ്ങളിൽ വ്യാഴാഴ്ച പെയ്ത ശക്തമായ മഴയെത്തുടർന്ന് താഴ്‌വരകളും മലയോര മേഖലകളും വെള്ളത്തിനടിയിലായി. ഫുജൈറ, റാസൽഖൈമ എന്നീ എമിറേറ്റുകളിലാണ് ഏറ്റവും കൂടുതൽ മഴ ലഭിച്ചത്. മഴ കനത്തതോടെ വാദികൾ നിറഞ്ഞൊഴുകാനും വെള്ളക്കെട്ടുണ്ടാകാനും സാധ്യതയുള്ളതിനാൽ മലയോര മേഖലകളിൽ ദേശീയ കാലാവസ്ഥാ നിരീക്ഷണ കേന്ദ്രം (NCM) മിന്നൽ പ്രളയ മുന്നറിയിപ്പ് പുറപ്പെടുവിച്ചു.

വിവിധ ഭാഗങ്ങളിൽ യെല്ലോ അലർട്ട്

ഫുജൈറ, റാസൽഖൈമ, അൽ ഐനിന്റെ ചില ഭാഗങ്ങൾ എന്നിവിടങ്ങളിൽ വെള്ളിയാഴ്ച രാവിലെ ഒമ്പതു മണി വരെ കാലാവസ്ഥാ കേന്ദ്രം യെല്ലോ അലർട്ട് പ്രഖ്യാപിച്ചിട്ടുണ്ട്. ശക്തമായ കാറ്റിനും പൊടിക്കാറ്റിനും സാധ്യതയുള്ളതിനാൽ വാഹനയാത്രക്കാരും പൊതുജനങ്ങളും അതീവ ജാഗ്രത പാലിക്കണമെന്ന് അധികൃതർ നിർദ്ദേശിച്ചു. ഷാർജയുടെ വിവിധ ഭാഗങ്ങളിൽ നേരിയ ചാറ്റൽ മഴയ്ക്ക് സാധ്യതയുണ്ടെന്നും എൻ.സി.എം അറിയിച്ചു.

വാരാന്ത്യത്തിൽ മഴ കുറയും; തിങ്കളാഴ്ച വീണ്ടും ശക്തമാകും

വെള്ളിയാഴ്ചയും രാജ്യത്തിന്റെ വിവിധ ഭാഗങ്ങളിൽ മഴ തുടരാൻ സാധ്യതയുണ്ട്. എന്നാൽ വാരാന്ത്യത്തോടെ മഴയ്ക്ക് നേരിയ ശമനമുണ്ടാകുമെന്നാണ് കാലാവസ്ഥാ പ്രവചനം. എങ്കിലും തീരദേശ മേഖലകളിലും വടക്കൻ പ്രദേശങ്ങളിലും മേഘാവൃതമായ അന്തരീക്ഷം തുടരും. തിങ്കളാഴ്ചയോടെ രാജ്യത്തിന്റെ കിഴക്കൻ, വടക്കൻ മേഖലകളിൽ വീണ്ടും മഴ പെയ്യാൻ സാധ്യതയുണ്ടെന്നും കാലാവസ്ഥാ നിരീക്ഷണ കേന്ദ്രം വ്യക്തമാക്കി.

വാദികളിലേക്ക് ഇറങ്ങരുതെന്ന് കർശന നിർദ്ദേശം

രാജ്യത്ത് ശൈത്യകാലം ആരംഭിക്കുന്നതോടെ മഴ ശക്തമാകുന്ന സാഹചര്യത്തിൽ മലയോര മേഖലകളിലേക്ക് യാത്ര ചെയ്യുന്ന താമസക്കാരും വിനോദസഞ്ചാരികളും കനത്ത ജാഗ്രത പാലിക്കണമെന്ന് അധികൃതർ ഓർമ്മിപ്പിച്ചു. വാദികൾ കരകവിഞ്ഞൊഴുകുമ്പോൾ വാഹനങ്ങൾ ഒഴുക്കിൽപ്പെടാനും ചെളിയിൽ പുതയാനും സാധ്യതയുള്ളതിനാൽ ഇത്തരം അപകടമേഖലകളിൽ നിന്ന് പൂർണ്ണമായും വിട്ടുനിൽക്കണമെന്നും സുരക്ഷാ നിർദ്ദേശങ്ങൾ പാലിക്കണമെന്നും അധികൃതർ അറിയിച്ചു.