സൗദിയിലെ 4 പ്രവിശ്യകളിലെ മലയോര മേഖലകളിൽ ശക്തമായ മഴയ്ക്ക് സാധ്യത; കിഴക്കൻ പ്രവിശ്യകളിൽ കഠിനമായ ചൂട് തുടരും

സൗദി അറേബ്യയിലെ നാല് പ്രധാന പ്രവിശ്യകളിലെ മലയോര മേഖലകളിൽ ശക്തമായ കാറ്റോടു കൂടിയ മഴയ്ക്ക് സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം (NCM) അറിയിച്ചു. ഇന്ന് ജിസാൻ, അസീർ, അൽ-ബാഹ, മക്ക എന്നീ പ്രവിശ്യകളിലെ ഉയർന്ന മലയോര പ്രദേശങ്ങളിലാണ് ഇടിമിന്നലോടു കൂടിയ മഴമേഘങ്ങൾ രൂപപ്പെടാൻ സാധ്യതയുള്ളത്.

അതേസമയം, രാജ്യത്തിന്റെ കിഴക്കൻ പ്രവിശ്യകളിൽ ചൂട് കഠിനമായി തുടരുമെന്നും കാലാവസ്ഥാ കേന്ദ്രം മുന്നറിയിപ്പ് നൽകി. ഇവിടങ്ങളിലെ ചില ഭാഗങ്ങളിൽ സാധാരണയിൽ കവിഞ്ഞ ശക്തമായ ചൂടാണ് ഇപ്പോൾ അനുഭവപ്പെടുന്നത്.

ഇതിനുപുറമെ കിഴക്കൻ പ്രവിശ്യ, റിയാദ്, ഖസീം, ഹാഇൽ, തബൂക്ക്, മദീന, മക്ക എന്നിവിടങ്ങളിൽ ശക്തമായ കാറ്റിനും അതുവഴി അന്തരീക്ഷത്തിൽ വലിയ രീതിയിൽ പൊടിപടലങ്ങൾ ഉയരാനും സാധ്യതയുണ്ട്. ഇത് റോഡുകളിൽ കാഴ്ചപരിധി (Visibility) ഗണ്യമായി കുറയ്ക്കാൻ ഇടയാക്കുമെന്നതിനാൽ വാഹനമോടിക്കുന്നവർ അതീവ ജാഗ്രത പാലിക്കണമെന്ന് സുരക്ഷാ അധികൃതർ പ്രത്യേക നിർദ്ദേശം നൽകി.