ഹോർമുസ് കടലിടുക്കിൽ എണ്ണക്കപ്പലിന് നേരെ മിസൈൽ ആക്രമണം; പിന്നിൽ ഇറാനെന്ന് യുഎസ്

തന്ത്രപ്രധാനമായ ഹോർമുസ് കടലിടുക്കിൽ ഒമാൻ തീരത്തിന് സമീപം എണ്ണക്കപ്പലിന് നേരെ മിസൈൽ ആക്രമണം. ആക്രമണത്തിൽ കപ്പലിന് തീപിടിക്കുകയും നാശനഷ്ടങ്ങൾ സംഭവിക്കുകയും ചെയ്തതായി ബ്രിട്ടീഷ് സമുദ്ര സുരക്ഷാ ഏജൻസിയായ യുണൈറ്റഡ് കിംഗ്ഡം മാരിടൈം ട്രേഡ് ഓപ്പറേഷൻസ് (UKMTO) സ്ഥിരീകരിച്ചു. സംഭവത്തിൽ ആർക്കും പരിക്കേറ്റിട്ടില്ല. ഒമാനിലെ ലിമയ്ക്ക് സമീപം തെക്കോട്ട് സഞ്ചരിക്കുകയായിരുന്ന കപ്പലിന് നേരെയാണ് ആക്രമണമുണ്ടായത്. രണ്ട് വാണിജ്യ കപ്പലുകൾക്ക് നേരെ ഇറാൻ സൈന്യം മിസൈൽ തൊടുത്തുവിട്ടതായി യുഎസ് ഉദ്യോഗസ്ഥർ ആരോപിച്ചു. ആക്രമണത്തിന്റെ പശ്ചാത്തലത്തിൽ ഇറാനെതിരെ ശക്തമായ പ്രത്യാക്രമണം നടത്താൻ അമേരിക്ക ആലോചിക്കുന്നതായാണ് റിപ്പോർട്ടുകൾ.

ഇറാനും അമേരിക്കയും തമ്മിലുണ്ടായിരുന്ന ഒരാഴ്ചത്തെ താൽക്കാലിക വെടിനിർത്തൽ കരാർ അവസാനിച്ചതിന് തൊട്ടുപിന്നാലെയാണ് ഈ ആക്രമണം നടന്നിരിക്കുന്നത്. ഫെബ്രുവരിയിൽ യുഎസ്-ഇസ്രയേൽ സംയുക്ത ആക്രമണത്തിൽ കൊല്ലപ്പെട്ട ഇറാന്റെ മുൻ പരമോന്നത നേതാവ് ആയത്തുള്ള അലി ഖമനേയിയുടെ വിലാപ ചടങ്ങുകൾ പ്രമാണിച്ചായിരുന്നു ഈ താൽക്കാലിക ഇടവേള.

ഹോർമുസ് കടലിടുക്കിലൂടെയുള്ള കപ്പൽ ഗതാഗതം സുഗമമാക്കുന്നതിനായി ദോഹയിൽ നടന്ന സമാധാന ചർച്ചകളിൽ പുരോഗതി ഉണ്ടാകാത്തതും വെടിനിർത്തൽ അവസാനിച്ചതുമാണ് മേഖലയെ വീണ്ടും സംഘർഷത്തിലേക്ക് തള്ളിവിട്ടത്. ലോകത്തിലെ എണ്ണ വിതരണത്തിന്റെ അഞ്ചിലൊന്നും കടന്നുപോകുന്ന ഏറ്റവും നിർണായകമായ ഈ പാതയിലെ പുതിയ സംഭവവികാസങ്ങൾ ആഗോള ഊർജ്ജ വിപണിയെയും എണ്ണവിലയെയും വരും ദിവസങ്ങളിൽ ദോഷകരമായി ബാധിച്ചേക്കുമെന്ന ആശങ്ക ശക്തമാണ്.