ദേശീയ പതാക ദിനാഘോഷം: ഗ്ലോബൽ വില്ലേജിൽ 700 ഡ്രോണുകൾ അണിനിരക്കുന്ന ദൃശ്യവിരുന്ന്

യു.എ.ഇ ദേശീയ പതാക ദിനത്തോട് (UAE Flag Day) അനുബന്ധിച്ച് ദുബായ് ഗ്ലോബൽ വില്ലേജിൽ വിപുലമായ ആഘോഷ പരിപാടികൾ സംഘടിപ്പിക്കുന്നു. നവംബർ 3-ന് രാത്രി 8 മണിക്ക് 700 എൽ.ഇ.ഡി ഡ്രോണുകൾ വാനിൽ അണിനിരക്കുന്ന അപൂർവ്വ ദൃശ്യവിരുന്നാണ് പ്രധാന ആകർഷണം. രാജ്യത്തിന്റെ ഐക്യവും അഭിമാനവും വിളിച്ചോതുന്ന രീതിയിൽ യു.എ.ഇ ദേശീയ പതാകയുടെ ചുവപ്പ്, പച്ച, വെള്ള, കറുപ്പ് നിറങ്ങൾ ആകാശത്ത് തെളിയും.

ആഘോഷങ്ങളുടെ ഭാഗമായി ഗ്ലോബൽ വില്ലേജിലെ പ്രധാന കേന്ദ്രങ്ങളും കെട്ടിടങ്ങളും ദേശീയ പതാകയുടെ വർണ്ണങ്ങളാൽ അലങ്കരിക്കും. സന്ദർശകർക്ക് സ്വീകരണ കവാടത്തിൽ വെച്ച് സൗജന്യമായി യു.എ.ഇ പതാകകളും വിതരണം ചെയ്യും. യു.എ.ഇ പവലിയനിൽ പാരമ്പര്യ കരകൗശല ഉൽപ്പന്നങ്ങളും തദേശീയ വിഭവങ്ങളും സന്ദർശകർക്കായി ഒരുക്കിയിട്ടുണ്ട്. ഔദ്യോഗിക വെബ്‌സൈറ്റ് (globalvillage.ae), മൊബൈൽ ആപ്പ്, കവാടങ്ങളിലെ ടിക്കറ്റ് കൗണ്ടറുകൾ എന്നിവ വഴി സന്ദർശകർക്ക് ടിക്കറ്റുകൾ മുൻകൂട്ടി ബുക്ക് ചെയ്യാം.