യുഎഇയിൽ തൊഴിലാളികളുടെ താമസസ്ഥലങ്ങളിൽ പുതിയ നിയമങ്ങൾ; സൗജന്യ ഇന്റർനെറ്റും മെച്ചപ്പെട്ട സൗകര്യങ്ങളും നിർബന്ധം

യുഎഇയിലെ തൊഴിലാളികളുടെ ജീവിതസാഹചര്യങ്ങൾ മെച്ചപ്പെടുത്തുന്നതിനായി മാനവവിഭവശേഷി സ്വദേശിവൽക്കരണ മന്ത്രാലയം (Mohre) പുതിയ മാർഗ്ഗനിർദ്ദേശങ്ങൾ പുറത്തിറക്കി. തൊഴിലാളികൾക്ക് മാന്യവും സൗകര്യപ്രദവുമായ താമസസൗകര്യം ഉറപ്പാക്കുക എന്ന ലക്ഷ്യത്തോടെയാണ് ഈ പരിഷ്കാരങ്ങൾ നടപ്പിലാക്കുന്നത്. താമസസ്ഥലങ്ങളിൽ തൊഴിലാളികൾക്ക് സൗജന്യ ഇന്റർനെറ്റ് സേവനം നൽകണമെന്നതാണ് പുതിയ നിയമത്തിലെ ഏറ്റവും പ്രധാനപ്പെട്ട ഒരു മാറ്റം. കുടുംബാംഗങ്ങളുമായി ബന്ധപ്പെടാനും ഓൺലൈൻ സേവനങ്ങൾ ഉപയോഗിക്കാനും ഇത് അവരെ സഹായിക്കും.

തൊഴിലാളികൾ താമസിക്കുന്ന മുറികളിലെ സൗകര്യങ്ങളിലും വലിയ മാറ്റങ്ങൾ മന്ത്രാലയം നിർദ്ദേശിച്ചിട്ടുണ്ട്. ഓരോ തൊഴിലാളിക്കും തറയിൽ ഉറങ്ങുന്നതിന് പകരം ശരിയായ കട്ടിൽ, വ്യക്തിഗത സ്റ്റോറേജ് സ്പേസ്, ലോക്കർ, വൃത്തിയുള്ള കിടക്കപ്പകരണങ്ങൾ എന്നിവ ലഭ്യമാക്കണം. മുറികളിൽ ശരിയായ വായുസഞ്ചാരവും എയർ കണ്ടീഷനിംഗും ഉറപ്പാക്കുന്നതോടൊപ്പം വിൻഡോ കർട്ടനുകളും മതിയായ സ്ഥലസൗകര്യവും ഉണ്ടായിരിക്കണം. ശുചിത്വവും സുരക്ഷിതത്വവും മുൻനിർത്തി മുറികൾക്കുള്ളിൽ പാചകം ചെയ്യുന്നത് പുതിയ നിയമപ്രകാരം അനുവദനീയമല്ല.

ശുചിത്വത്തിനും ആരോഗ്യ സുരക്ഷയ്ക്കും പുതിയ മാനദണ്ഡങ്ങളിൽ പ്രത്യേക ഊന്നൽ നൽകുന്നുണ്ട്. താമസസ്ഥലങ്ങൾ ദിവസവും വൃത്തിയാക്കണമെന്നും മാലിന്യ നിർമ്മാർജ്ജനത്തിനും കീടനിയന്ത്രണത്തിനും ശരിയായ സംവിധാനങ്ങൾ വേണമെന്നും മന്ത്രാലയം വ്യക്തമാക്കി. ബാത്ത്റൂമുകൾ, അടുക്കളകൾ, ഡൈനിംഗ് ഏരിയകൾ എന്നിവ ആരോഗ്യ മാനദണ്ഡങ്ങൾ പാലിച്ച് പരിപാലിക്കണം. കൂടാതെ, തൊഴിലാളികൾക്ക് ശുദ്ധമായ കുടിവെള്ളം ലഭ്യമാണെന്ന് ഉറപ്പുവരുത്തുകയും വേണം.

ആരോഗ്യ പരിരക്ഷയുടെ ഭാഗമായി താമസസ്ഥലങ്ങളിൽ ഫസ്റ്റ് എയ്ഡ് മുറികളും രോഗികൾക്കായി ഐസൊലേഷൻ മുറികളും സജ്ജീകരിക്കണം. 1,000-ത്തിലധികം തൊഴിലാളികൾ താമസിക്കുന്ന വലിയ കമ്മ്യൂണിറ്റികളിൽ ഓൺ-സൈറ്റ് ക്ലിനിക്കുകൾ ആവശ്യമാണ്. വായുസഞ്ചാരമില്ലായ്മ, അമിതമായി ആളുകളെ താമസിപ്പിക്കൽ (Overcrowding), കുടിവെള്ളത്തിന്റെ അഭാവം, അഗ്നിശമന സുരക്ഷാ വീഴ്ചകൾ എന്നിവ ഗുരുതരമായ നിയമലംഘനങ്ങളായി കണക്കാക്കും. ഇത്തരം വീഴ്ചകൾക്കെതിരെ അധികൃതർ കർശന നടപടി സ്വീകരിക്കുമെന്നും പുതിയ ഗൈഡ് മുന്നറിയിപ്പ് നൽകുന്നു.