യാത്രാ സർവീസ് ഉടൻ; ജീവനക്കാരുടെ പുതിയ യൂണിഫോം അവതരിപ്പിച്ച് ഇത്തിഹാദ് റെയിൽ

യു.എ.ഇയുടെ ദേശീയ റെയിൽവേ ശൃംഖലയായ ഇത്തിഹാദ് റെയിൽ ജീവനക്കാരുടെ ഔദ്യോഗിക യൂണിഫോം പൊതുജനങ്ങൾക്ക് മുന്നിൽ ആദ്യമായി അവതരിപ്പിച്ചു. രാജ്യം ഏറെ ആകാംക്ഷയോടെ കാത്തിരിക്കുന്ന യാത്രാ ട്രെയിൻ സർവീസുകൾ ആരംഭിക്കുന്നതിന് മുന്നോടിയായാണ് ഈ സുപ്രധാന ചുവടുവെപ്പ്. ഘട്ടം ഘട്ടമായുള്ള വിന്യാസത്തിലൂടെ എമിറേറ്റുകളിലുടനീളമുള്ള നഗരങ്ങളെയും സമൂഹങ്ങളെയും പരസ്പരം ബന്ധിപ്പിക്കാൻ ലക്ഷ്യമിട്ടാണ് ദേശീയ റെയിൽവേ ശൃംഖല ഒരുങ്ങുന്നത്.

കടും ചുവപ്പ് ലൈനുകളുള്ള ചാര നിറത്തിലുള്ള (Gray) ആകർഷകമായ യൂണിഫോമാണ് ഇത്തിഹാദ് റെയിൽ പുറത്തിറക്കിയത്. ഇതിലെ ചാരനിറം വിശ്വാസ്യതയെയും ശാന്തതയെയും പ്രതിനിധീകരിക്കുമ്പോൾ, ചുവന്ന വരകൾ ദേശീയ റെയിൽ പദ്ധതിക്ക് പിന്നിലെ ലക്ഷ്യബോധത്തെയും ഊർജ്ജത്തെയുമാണ് പ്രതിഫലിപ്പിക്കുന്നത്.

ട്രെയിനിലെ ഹോസ്റ്റുമാർ, സ്റ്റേഷൻ ജീവനക്കാർ, ഉപഭോക്താക്കളുമായി നേരിട്ട് ഇടപഴകുന്ന മറ്റ് കസ്റ്റമർ സർവീസ് ടീമുകൾ എന്നിവരായിരിക്കും ഈ പുതിയ യൂണിഫോം ധരിക്കുക. അന്താരാഷ്ട്ര പ്രൊഫഷണലിസവും എമിറാത്തി ആതിഥ്യമര്യാദയുടെ പരമ്പരാഗത മൂല്യങ്ങളും ഒത്തുചേരുന്ന രീതിയിലാണ് യൂണിഫോമിന്റെ രൂപകൽപ്പന നിർവ്വഹിച്ചിരിക്കുന്നത്.