നികുതിദായകർക്ക് ധരീബ പ്ലാറ്റ്ഫോമിലൂടെ ഓൺലൈൻ മീറ്റിങ് ബുക്കിങ് സേവനവുമായി ഖത്തർ ജനറൽ ടാക്സ് അതോറിറ്റി
നികുതിദായകർക്ക് ഉദ്യോഗസ്ഥരുമായി എളുപ്പത്തിൽ ആശയവിനിമയം നടത്തുന്നതിനായി 'ധരീബ' (Dhareeba) പ്ലാറ്റ്ഫോമിലൂടെ ഓൺലൈൻ മീറ്റിങ് ബുക്കിങ് സേവനം ആരംഭിച്ചതായി ഖത്തർ ജനറൽ ടാക്സ് അതോറിറ്റി (GTA) അറിയിച്ചു. നികുതിദായകരുമായുള്ള ഇടപാടുകൾ കൂടുതൽ സുഗമമാക്കുന്നതിന്റെയും അതോറിറ്റിയുടെ ഡിജിറ്റൽ പരിവർത്തനത്തിന്റെയും ഭാഗമായാണ് പുതിയ സംവിധാനം ഏർപ്പെടുത്തിയത്.
നികുതി സംബന്ധമായ സംശയങ്ങൾ, വിവരങ്ങൾ, മറ്റു നടപടിക്രമങ്ങൾ എന്നിവ ചർച്ച ചെയ്യുന്നതിനായി അതത് വകുപ്പുകളിലെ വിദഗ്ധരുമായും ഉദ്യോഗസ്ഥരുമായും കൂടിക്കാഴ്ചയ്ക്ക് അപേക്ഷിക്കാൻ ഈ സേവനത്തിലൂടെ സാധിക്കും. നികുതിദായകർക്ക് തങ്ങൾക്ക് അനുയോജ്യമായ സമയവും ചർച്ച ചെയ്യേണ്ട വിഷയവും മുൻകൂട്ടി തെരഞ്ഞെടുക്കാവുന്നതാണ്. കൂടാതെ, കൂടിക്കാഴ്ചയ്ക്ക് ആവശ്യമായ വിവരങ്ങളും രേഖകളും അപേക്ഷയോടൊപ്പം മുൻകൂട്ടി അപ്ലോഡ് ചെയ്യാനും സൗകര്യമുണ്ട്. ഇത് ഉദ്യോഗസ്ഥർക്ക് വിഷയം പഠിച്ച് കൃത്യമായ മാർഗനിർദേശങ്ങൾ നൽകാൻ സഹായിക്കും.
ധരീബ പ്ലാറ്റ്ഫോമിൽ ലോഗിൻ ചെയ്ത്, നാഷണൽ ഓതെന്റിക്കേഷൻ സിസ്റ്റം (തൗതീഖ്) വഴി രജിസ്റ്റർ ചെയ്ത് അപേക്ഷ സമർപ്പിക്കാം. സമർപ്പിച്ച അപേക്ഷയുടെ നിലവിലെ സ്റ്റാറ്റസ് ഓൺലൈനായി പരിശോധിക്കാനും സാധിക്കും. നികുതി നടപടിക്രമങ്ങൾ ലളിതമാക്കാനും സേവനങ്ങൾ വേഗത്തിലാക്കാനും നികുതി നിയമങ്ങൾ കൂടുതൽ കാര്യക്ഷമമായി പാലിക്കപ്പെടുന്നുവെന്ന് ഉറപ്പാക്കാനും ഈ ഡിജിറ്റൽ സംവിധാനം വഴി സാധിക്കുമെന്ന് ജനറൽ ടാക്സ് അതോറിറ്റി വ്യക്തമാക്കി.