യുഎഇയിൽ ഇന്നും മഴയ്ക്ക് സാധ്യത; ചിലയിടങ്ങളിൽ പൊടിക്കാറ്റിനും സാധ്യത

യുഎഇയുടെ വിവിധ ഭാഗങ്ങളിൽ ഇന്നും മഴയ്ക്ക് സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം. രാജ്യത്ത് ഇന്ന് ഭാഗികമായി മേഘാവൃതമായ കാലാവസ്ഥയായിരിക്കും. ഉച്ചയോടെ കിഴക്കൻ, തെക്കൻ മേഖലകളിൽ മഴമേഘങ്ങൾ രൂപപ്പെടാൻ സാധ്യതയുണ്ട്. ഇതിന്റെ ഭാഗമായി ചിലയിടങ്ങളിൽ മഴ ലഭിച്ചേക്കും.

ഉൾനാടൻ മേഖലകളിൽ താപനില 41 മുതൽ 46 ഡിഗ്രി സെൽഷ്യസ് വരെയും തീരപ്രദേശങ്ങളിലും ദ്വീപുകളിലും 37 മുതൽ 42 ഡിഗ്രി വരെയും ഉയരും. ഉയർന്ന പർവതപ്രദേശങ്ങളിൽ 30 മുതൽ 36 ഡിഗ്രി വരെയായിരിക്കും താപനില.

മണിക്കൂറിൽ 10 മുതൽ 25 കിലോമീറ്റർ വരെ വേഗതയിൽ സാധാരണ കാറ്റ് വീശും. മേഘാവൃതമായ പ്രദേശങ്ങളിൽ കാറ്റിന്റെ വേഗം മണിക്കൂറിൽ 45 കിലോമീറ്റർ വരെയാകാം. ഇതോടെ പൊടിക്കാറ്റിനും കാഴ്ചപരിധി കുറയുന്നതിനും സാധ്യതയുണ്ട്.

ഇന്ന് രാത്രിയിലും ശനിയാഴ്ച രാവിലെയും തീരപ്രദേശങ്ങളിലും ഉൾനാടൻ മേഖലകളിലും അന്തരീക്ഷ ഈർപ്പം 90 ശതമാനം വരെ ഉയർന്നേക്കും. ഇത് മൂടൽമഞ്ഞിന് കാരണമാകാനും സാധ്യതയുണ്ട്.

അറേബ്യൻ ഉൾക്കടലിലും ഒമാൻ കടലിലും കടൽ പൊതുവെ ശാന്തമായിരിക്കും. തിങ്കൾ, ചൊവ്വ ദിവസങ്ങളോടെ രാജ്യത്തെ കാലാവസ്ഥ കൂടുതൽ തെളിയുമെന്നാണ് ദേശീയ കാലാവസ്ഥാ നിരീക്ഷണ കേന്ദ്രത്തിന്റെ വിലയിരുത്തൽ.