യുഎഇയിൽ നാളെ മഴയ്ക്ക് സാധ്യത; അബുദാബിയിലും ദുബായിലും താപനില 19 ഡിഗ്രി സെൽഷ്യസിലേക്ക് താഴുമെന്ന് മുന്നറിയിപ്പ്

യുഎഇയുടെ വിവിധ ഭാഗങ്ങളിൽ നാളെ (ഏപ്രിൽ 4, ശനി) നേരിയ മഴയ്ക്ക് സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം (NCM) അറിയിച്ചു. ശനിയാഴ്ച പുലർച്ചെയോടെ തീരദേശ മേഖലകളിലും ദ്വീപുകളിലും ആകാശം ഭാഗികമായി മേഘാവൃതമാകാനും മഴ പെയ്യാനും സാധ്യതയുണ്ടെന്നാണ് കാലാവസ്ഥാ പ്രവചനം.

താപനിലയിൽ നേരിയ വർദ്ധനവ് പ്രതീക്ഷിക്കുന്നുണ്ടെങ്കിലും അബുദാബിയിലും ദുബായിലും സുഖകരമായ കാലാവസ്ഥയായിരിക്കും അനുഭവപ്പെടുക. ഈ രണ്ട് നഗരങ്ങളിലും കൂടിയ താപനില 27 ഡിഗ്രി സെൽഷ്യസിൽ കൂടാൻ സാധ്യതയില്ല. കുറഞ്ഞ താപനില 19 ഡിഗ്രി സെൽഷ്യസിലേക്ക് താഴുമെന്നും കാലാവസ്ഥാ കേന്ദ്രം വ്യക്തമാക്കി.

മണിക്കൂറിൽ 10 മുതൽ 20 കിലോമീറ്റർ വരെ വേഗതയിൽ വടക്കുപടിഞ്ഞാറൻ ദിശയിൽ നിന്ന് കാറ്റ് വീശാൻ സാധ്യതയുണ്ട്. ചില സമയങ്ങളിൽ കാറ്റിന്റെ വേഗത 30 കിലോമീറ്റർ വരെ ഉയർന്നേക്കാം. അറേബ്യൻ ഗൾഫിലും ഒമാൻ കടലിലും കടൽ ശാന്തമായിരിക്കുമെന്നും കാലാവസ്ഥാ ബുള്ളറ്റിനിൽ പറയുന്നു. വരും ദിവസങ്ങളിൽ കാലാവസ്ഥയിലുണ്ടാകുന്ന മാറ്റങ്ങൾ ശ്രദ്ധിക്കണമെന്ന് അധികൃതർ പൊതുജനങ്ങളോട് നിർദ്ദേശിച്ചു.