യുക്രൈനിലെ സ്കൂൾ കെട്ടിടത്തിന് നേരെ റഷ്യയുടെ കനത്ത ബോംബാക്രമണം; 33 പേർ കൊല്ലപ്പെട്ടതായി സെലൻസ്കി

യുക്രൈനിലെ തെക്കുകിഴക്കൻ മേഖലയിൽ സിവിലിയന്മാർ അഭയം പ്രാപിച്ചിരുന്ന ഒരു സ്കൂൾ കെട്ടിടത്തിന് നേരെ റഷ്യ നടത്തിയ കനത്ത ബോംബാക്രമണത്തിൽ 33 പേർ കൊല്ലപ്പെട്ടു. അമ്പതോളം പേർ കെട്ടിടാവശിഷ്ടങ്ങൾക്കിടയിൽ കുടുങ്ങിക്കിടക്കുന്നതായി പ്രാദേശിക അധികൃതരെ ഉദ്ധരിച്ച് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്തു. റഷ്യ ഒമ്പതോളം വിനാശകാരിയായ ബോംബുകളാണ് സ്കൂളിന് നേരെ വർഷിച്ചതെന്ന് യുക്രൈൻ പ്രസിഡന്റ് വ്ളോദിമിർ സെലൻസ്കി സ്ഥിരീകരിച്ചു. ഈ യുദ്ധത്തിലെ തന്നെ ഏറ്റവും മാരകമായ ആക്രമണങ്ങളിലൊന്നാണിതെന്നും അദ്ദേഹം കൂട്ടിച്ചേർത്തു.

അഭയകേന്ദ്രമായും ജീവകാരുണ്യ സഹായ വിതരണ കേന്ദ്രവുമായാണ് ദുരന്തമുണ്ടായ ഈ സ്‌കൂൾ കെട്ടിടം പ്രവർത്തിച്ചിരുന്നത്. ആക്രമണങ്ങളെ പ്രതിരോധിക്കാൻ യൂറോപ്യൻ യൂണിയന്റെ ധനസഹായത്തോടെ പ്രത്യേകമായി നിർമ്മിച്ച ശക്തമായ കോൺക്രീറ്റ് ബേസ്‌മെന്റിലാണ് ആളുകൾ അഭയം പ്രാപിച്ചിരുന്നതെന്ന് പ്രാദേശിക ഗവർണർ മിക്കാലോ സെമിൻ പറഞ്ഞു.

എന്നാൽ റഷ്യൻ ബോംബുകളുടെ അതിശക്തമായ ആഘാതത്തിൽ കോൺക്രീറ്റ് ഘടന പൂർണ്ണമായി തകരുകയും തുടർന്ന് വലിയ തീപിടിത്തം ഉണ്ടാകുകയുമായിരുന്നു. ദുരന്തസ്ഥലത്ത് അവശിഷ്ടങ്ങൾക്കിടയിൽ കുടുങ്ങിക്കിടക്കുന്നവരെ പുറത്തെടുക്കാനുള്ള അടിയന്തര രക്ഷാപ്രവർത്തനം തുടരുകയാണ്.