സൗദിയിൽ പുതിയ അധ്യയന വർഷത്തിന് ഞായറാഴ്ച തുടക്കം; പുതിയ ഡിജിറ്റൽ സംവിധാനങ്ങളുമായി വിദ്യാഭ്യാസ മന്ത്രാലയം

സൗദി അറേബ്യയിലെ പൊതു വിദ്യാലയങ്ങളിൽ പുതിയ അധ്യയന വർഷത്തിന് ഞായറാഴ്ച തുടക്കമാകും. ഇതിന്റെ ഭാഗമായി അധ്യാപകരും രക്ഷിതാക്കളും തമ്മിലുള്ള ഏകോപനവും വിദ്യാർഥികളുടെ അക്കാദമിക് പുരോഗതി നിരീക്ഷണവും എളുപ്പമാക്കാൻ പുതിയ ഡിജിറ്റൽ സംവിധാനത്തിന് മന്ത്രാലയം തുടക്കം കുറിക്കുകയാണ്.

ഏകീകൃത വിദ്യാഭ്യാസ പോർട്ടൽ വഴി ലഭ്യമാക്കുന്ന ഈ സംവിധാനത്തിലൂടെ ഹോംവർക്കുകൾ, അസൈൻമെന്റുകൾ, പരീക്ഷാ വിവരങ്ങൾ എന്നിവ രക്ഷിതാക്കൾക്കും വിദ്യാർഥികൾക്കും എളുപ്പത്തിൽ പരിശോധിക്കാം. സ്കൂളുകളിൽ നേരിട്ടെത്താതെ തന്നെ അധ്യാപകരുമായും സ്കൂൾ അധികൃതരുമായും ആശയവിനിമയം നടത്താനും ഇത് സഹായിക്കും.

ഡിജിറ്റൽ ഐഡി കാർഡും ഇ-സേവനങ്ങളും

• ഡിജിറ്റൽ ഐഡന്റിറ്റി കാർഡ്: വിദ്യാർഥികളുടെ പേര്, ഐഡി നമ്പർ, സ്കൂൾ, ഗ്രേഡ് എന്നിവ അടങ്ങിയ ഔദ്യോഗിക ഡിജിറ്റൽ ഐഡി കാർഡുകൾ മന്ത്രാലയം ലഭ്യമാക്കിയിട്ടുണ്ട്. ഇതിലെ ക്യു.ആർ (QR) കോഡ് വഴി ഐഡന്റിറ്റി പരിശോധിക്കാം.
• ഓൺലൈൻ സേവനങ്ങൾ: പുതിയ വിദ്യാർഥികളുടെ വിവരങ്ങൾ ചേർക്കൽ, വിലാസം തിരുത്തൽ, സ്കൂൾ ട്രാൻസ്ഫർ, സ്കൂൾ ബസ് രജിസ്ട്രേഷൻ തുടങ്ങിയ സേവനങ്ങളും പോർട്ടൽ വഴി ലഭ്യമാണ്.