വർഷത്തിന്റെ ആദ്യ അഞ്ച് മാസം; ബഹ്‌റൈൻ വിമാനത്താവളത്തിൽ സർവീസുകളിൽ വലിയ ഏറ്റക്കുറച്ചിലുകൾ

2026-ന്റെ ആദ്യ അഞ്ച് മാസങ്ങളിൽ ബഹ്‌റൈൻ അന്താരാഷ്ട്ര വിമാനത്താവളത്തിന്റെ പ്രവർത്തനങ്ങളിൽ വലിയ ഏറ്റക്കുറച്ചിലുകൾ രേഖപ്പെടുത്തി. വർഷത്തിന്റെ തുടക്കത്തിൽ മികച്ച നിലയിലായിരുന്ന പ്രവർത്തനങ്ങളെ, മാർച്ചിൽ ഇറാൻ നടത്തിയ ആക്രമണങ്ങളെ തുടർന്നുണ്ടായ താൽക്കാലിക തടസ്സങ്ങൾ സാരമായി ബാധിച്ചു. ഔദ്യോഗിക ഓപ്പൺ ഡാറ്റാ പോർട്ടലിൽ പ്രസിദ്ധീകരിച്ച കണക്കുകൾ പ്രകാരം ജനുവരിയിൽ 59,580 വിമാന സർവീസുകളാണ് വിമാനത്താവളം വഴി നടന്നത്.

ഫെബ്രുവരിയിൽ ഇത് 50,210 ആയി കുറയുകയും തുടർന്ന് മാർച്ചിൽ സുരക്ഷാ കാരണങ്ങളാൽ വിമാനത്താവളത്തിന്റെ പ്രവർത്തനം പൂർണ്ണമായും നിലയ്ക്കുകയും ചെയ്തു. എന്നാൽ ഏപ്രിലിൽ പ്രവർത്തനങ്ങൾ പുനരാരംഭിച്ചതോടെ 1,474 വിമാനങ്ങൾ സർവീസ് നടത്തുകയും മെയ് മാസമായപ്പോഴേക്കും ഇത് 16,117 ആയി ഉയരുകയും ചെയ്തു. യാത്രക്കാരുടെ എണ്ണത്തിലും ഇതേ പ്രവണതയാണ് പ്രതിഫലിച്ചത്. ജനുവരിയിൽ 9,33,299 പേർ യാത്ര ചെയ്തപ്പോൾ ഫെബ്രുവരിയിൽ ഇത് 7,05,610 ആയി കുറഞ്ഞു. മാർച്ചിൽ യാത്രക്കാരുടെ എണ്ണം പൂജ്യത്തിലേക്ക് വീണെങ്കിലും, ഏപ്രിലിൽ 76,397 പേരും മെയ് മാസത്തിൽ 4,87,069 പേരും വിമാനത്താവളം വഴി യാത്ര ചെയ്തു.

എയർ കാർഗോ രംഗത്തും ഈ പ്രതിസന്ധി വലിയ ആഘാതമുണ്ടാക്കിയിരുന്നു. ജനുവരിയിലും ഫെബ്രുവരിയിലും ശരാശരി 13,000 ടണ്ണോളം ഉണ്ടായിരുന്ന ഇറക്കുമതി മാർച്ചിൽ 129 ടണ്ണായി കൂപ്പുകുത്തി. കയറ്റുമതി മേഖലയും സമാനമായ തകർച്ച നേരിട്ടെങ്കിലും, മെയ് മാസമായപ്പോഴേക്കും 3,352 ടണ്ണായി രാജ്യാന്തര ചരക്കുനീക്കം വീണ്ടെടുക്കലിന്റെ പാതയിലേക്ക് തിരിച്ചെത്തി.