ഖത്തറിൽ അസ്ഥിരമായ കാലാവസ്ഥ; ‘അൽ സറായാത്ത്’ സീസണാണെന്നും ആശങ്ക വേണ്ടെന്നും അധികൃതർ

ഖത്തറിൽ നിലവിലുള്ള അസ്ഥിരമായ കാലാവസ്ഥ ശൈത്യകാലത്തിന്റെ അവസാനത്തോടെ ഉണ്ടാകുന്ന സ്വാഭാവികമായ മാറ്റമാണെന്നും ആശങ്കപ്പെടേണ്ട സാഹചര്യമില്ലെന്നും ഖത്തർ സിവിൽ ഏവിയേഷൻ അതോറിറ്റിയിലെ കാലാവസ്ഥാ നിരീക്ഷണ വിഭാഗം ഡയറക്ടർ അബ്ദുള്ള മുഹമ്മദ് അൽ മന്നായി അറിയിച്ചു. പ്രാദേശികമായി 'അൽ സറായാത്ത്' (Al Sarayat) എന്നറിയപ്പെടുന്ന ഈ സീസണൽ പ്രതിഭാസം സാധാരണമാണെന്നും അടിയന്തരമായ ആശങ്കയുടെയോ മുന്നറിയിപ്പിന്റെയോ ആവശ്യമില്ലെന്നും അദ്ദേഹം വ്യക്തമാക്കി.

സാധാരണയായി മാർച്ച് അവസാന വാരത്തിൽ ആരംഭിച്ച് മെയ് പകുതി വരെ നീണ്ടുനിൽക്കുന്നതാണ് 'അൽ സറായാത്ത്' സീസൺ. വളരെ കുറഞ്ഞ സമയത്തിനുള്ളിൽ ആകാശത്ത് കുമുലോനിംബസ് മേഘങ്ങൾ രൂപപ്പെടുകയും തുടർന്ന് കനത്ത ഇടിമിന്നലോടു കൂടിയ മഴയും പൊടിപടലങ്ങൾ നിറഞ്ഞ കാറ്റും ഉണ്ടാകുന്നതാണ് ഇതിന്റെ പ്രത്യേകത. വൈകുന്നേരങ്ങളിലും രാത്രിയിലുമാണ് ഈ പ്രതിഭാസം സാധാരണയായി കൂടുതലായി കണ്ടുവരുന്നത്.

വരും ദിവസങ്ങളിൽ രാജ്യത്തിന്റെ വിവിധ ഭാഗങ്ങളിൽ മിതമായതോ കനത്തതോ ആയ ഇടിമിന്നലിന് സാധ്യതയുണ്ട്. ശക്തമായ കാറ്റിനും ചിലയിടങ്ങളിൽ ആലിപ്പഴ വർഷത്തിനും സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. കാറ്റും പൊടിയും കാരണം കാഴ്ചപരിധി കുറയാൻ സാധ്യതയുള്ളതിനാൽ വാഹനമോടിക്കുന്നവർ ജാഗ്രത പാലിക്കണം. എല്ലാവരും സുരക്ഷാ മാർഗനിർദേശങ്ങൾ പാലിക്കണമെന്നും അസ്ഥിരമായ കാലാവസ്ഥയുള്ളപ്പോൾ സുരക്ഷിതമായ സ്ഥലങ്ങളിൽ തുടരണമെന്നും അധികൃതർ അഭ്യർത്ഥിച്ചു.