സൗദിക്ക് ആണവോർജം നൽകാൻ 30 വർഷത്തെ കരാറിൽ ഒപ്പുവെച്ച് അമേരിക്ക

സൗദി അറേബ്യയും അമേരിക്കയും തമ്മിൽ 30 വർഷം നീളുന്ന ചരിത്രപ്രധാനമായ ആണവോർജ സഹകരണ കരാറിൽ ഒപ്പുവെച്ചു. സൗദിയുടെ ഊർജ്ജ മേഖലയ്ക്ക് വൻ കുതിപ്പേകുന്ന കരാറിനെതിരെ ഇസ്രായേലും യു.എസിലെ ചില വിഭാഗങ്ങളും ഉയർത്തിയ ശക്തമായ എതിർപ്പുകൾ മറികടന്നാണ് ട്രംപ് ഭരണകൂടം ഈ തീരുമാനമെടുത്തത്. ഇതോടെ സമാധാനപരമായ ആവശ്യങ്ങൾക്കായി യുറേനിയം സമ്പുഷ്ടീകരിക്കാൻ സൗദിക്ക് അവസരമൊരുങ്ങും.

മാസങ്ങൾ നീണ്ട ചർച്ചകൾക്കൊടുവിൽ ട്രംപ് അംഗീകാരം നൽകിയതിനെ തുടർന്ന് ഇരു രാജ്യങ്ങളിലെയും ഊർജ്ജ മന്ത്രാലയങ്ങളാണ് കരാർ ഒപ്പുവെച്ച വിവരം ഔദ്യോഗികമായി പ്രഖ്യാപിച്ചത്. വൈദ്യുതി ഉൽപ്പാദനത്തിനും മറ്റ് സമാധാനപരമായ ആവശ്യങ്ങൾക്കുമായിരിക്കും പദ്ധതിയെന്ന് സൗദി വ്യക്തമാക്കിയെങ്കിലും, രാജ്യത്തെ ആണവായുധ നിർമ്മാണത്തിലേക്ക് നയിക്കുമോ എന്ന ആശങ്ക ഇസ്രായേൽ പങ്കുവെച്ചിട്ടുണ്ട്.

സഹസ്രകോടി ഡോളറിന്റെ ഈ പദ്ധതിയിൽ ആണവോർജ്ജ പ്ലാന്റുകളുടെ നിർമ്മാണം, യുറേനിയം സമ്പുഷ്ടീകരണം, പ്രവർത്തനം എന്നിവയ്‌ക്കെല്ലാം യു.എസ് കമ്പനികളാകും നേതൃത്വം നൽകുക. മുൻപ് റഷ്യ ഉൾപ്പെടെയുള്ള രാജ്യങ്ങളുമായി സൗദി നടത്തിയിരുന്ന ആണവ സഹകരണ ചർച്ചകൾ ഇതോടെ അവസാനിക്കും. മേഖലയിൽ ഇറാന്റെ ആണവ ഭീഷണി നിലനിൽക്കുന്ന പശ്ചാത്തലത്തിൽ, ഈ കരാർ സൗദിയെ സംബന്ധിച്ച് വളരെ നിർണ്ണായകമായ ഒരു നേട്ടമാണ്.