സ്‌കൂൾ കുട്ടികൾക്കായി കൃഷിവകുപ്പിന്റെ 'കതിർ' പദ്ധതി; ബ്രാൻഡ് അംബാസഡറായി മോഹൻലാൽ
വിദ്യാർത്ഥികളിൽ കാർഷിക അവബോധം വളർത്തുന്നതിനായി കൃഷി വകുപ്പ് പൊതുവിദ്യാഭ്യാസ വകുപ്പിന്റെ സഹകരണത്തോടെ നടപ്പാക്കുന്ന 'കതിർ' പദ്ധതിയുടെ ബ്രാൻഡ് അംബാസഡറായി നടൻ മോഹൻലാൽ ചുമതലയേറ്റു. ആദ്യഘട്ടത്തിൽ സംസ്ഥാനത്തെ 500 വിദ്യാലയങ്ങളിലാണ് കതിർ കാർഷിക ക്ലബ്ബുകൾ രൂപീകരിക്കുന്നത്. അടുത്ത അധ്യയന വർഷത്തോടെ സംസ്ഥാനത്തെ മുഴുവൻ സ്കൂളുകളിലേക്കും പദ്ധതി വ്യാപിപ്പിക്കാനാണ് കൃഷിവകുപ്പ് ലക്ഷ്യമിടുന്നത്.
വെർച്വൽ ലോകത്തെ സ്ക്രീനുകളിൽ നിന്ന് മാറി മണ്ണിലേക്കിറങ്ങാൻ കുട്ടികൾ തയ്യാറാകണമെന്ന് മോഹൻലാൽ ആഹ്വാനം ചെയ്തു. കൃഷിയിൽ ഏർപ്പെടുന്ന കുട്ടികൾക്ക് വെയിറ്റേജ് മാർക്ക് നൽകാനുള്ള തീരുമാനം ഏറെ പ്രോത്സാഹജനകമാണെന്നും ഓരോ കുട്ടിയും ഒരു വിത്തെങ്കിലും നടാൻ മുൻകൈയെടുക്കണമെന്നും അദ്ദേഹം ആശംസിച്ചു. തന്റെ മാതാപിതാക്കളുടെ സ്മരണാർത്ഥമുള്ള 'വിശ്വശാന്തി ഫൗണ്ടേഷൻ' പദ്ധതിക്ക് പൂർണ്ണ പിന്തുണ വാഗ്ദാനം ചെയ്യുന്നതായും മോഹൻലാൽ വ്യക്തമാക്കി.
മോഹൻലാൽ പദ്ധതിയുടെ ഭാഗമായതോടെ കാർഷിക മേഖലയിൽ വലിയൊരു മുന്നേറ്റത്തിനാണ് തുടക്കമാകുന്നതെന്ന് കൃഷിവകുപ്പ് മന്ത്രി അഡ്വ. ടി. സിദ്ദിഖ് പ്രസ്താവിച്ചു. കുട്ടികളിൽ ലഹരി ഉപയോഗത്തിന് പകരം കൃഷിയുടെ ലഹരി വളർത്തിയെടുക്കാനാണ് ഈ പദ്ധതിയിലൂടെ സർക്കാർ ലക്ഷ്യമിടുന്നത്.