കോഴിക്കോട് മെഡിക്കൽ കോളജിൽ വീണ്ടും ചികിത്സാപ്പിഴവ് ആരോപണം; ഗർഭപാത്രം നീക്കം ചെയ്യാനെത്തിയ യുവതി മരിച്ചു

കോഴിക്കോട് ഗവ. മെഡിക്കൽ കോളജ് ആശുപത്രിയിൽ വീണ്ടും ചികിത്സാപ്പിഴവ് മൂലമുള്ള മരണം റിപ്പോർട്ട് ചെയ്തതായി പരാതി. ഗർഭപാത്രം നീക്കം ചെയ്യാനുള്ള ശസ്ത്രക്രിയയ്ക്കായി പ്രവേശിക്കപ്പെട്ട വടകര സ്വദേശിനി പി. തങ്കമണി (54) ആണ് മരണപ്പെട്ടത്. ഡോക്ടർമാരുടെ ഭാഗത്തുനിന്നുണ്ടായ ഗുരുതര വീഴ്ചയാണ് മരണത്തിന് കാരണമായതെന്ന ബന്ധുക്കളുടെ പരാതിയെ തുടർന്ന് മെഡിക്കൽ കോളജ് പോലീസ് കേസ് രജിസ്റ്റർ ചെയ്തു.

ഈ മാസം അഞ്ചിനാണ് തങ്കമണിയെ ശസ്ത്രക്രിയയ്ക്കായി ആശുപത്രിയിൽ പ്രവേശിപ്പിച്ചത്. എട്ടിന് ശസ്ത്രക്രിയ പൂർത്തിയാക്കി ഒൻപതിന് വാർഡിലേക്ക് മാറ്റിയെങ്കിലും പത്താം തീയതി യുവതി രക്തം ഛർദ്ദിക്കുകയായിരുന്നു. തുടർന്ന് പതിനൊന്നിന് അടിയന്തരമായി രണ്ടാമതും ശസ്ത്രക്രിയ നടത്തിയെങ്കിലും പന്ത്രണ്ടാം തീയതി മരണം സംഭവിക്കുകയായിരുന്നു.

ആദ്യ ശസ്ത്രക്രിയയ്ക്കിടെ ചെറുകുടലിൽ മുറിവേറ്റതായി ഡോക്ടർമാർ സമ്മതിച്ചിരുന്നെന്നും ഇതാണ് മരണത്തിലേക്ക് നയിച്ചതെന്നുമാണ് കുടുംബം ആരോപിക്കുന്നത്. സംഭവത്തിൽ ആശുപത്രി അധികൃതർ ഇതുവരെ ഔദ്യോഗിക പ്രതികരണം നടത്തിയിട്ടില്ല.