കെ.എസ്.ആർ.ടി.സിയിലെ സ്ത്രീകളുടെ സൗജന്യ യാത്ര; അന്തിമ റിപ്പോർട്ട് നാളെ സർക്കാരിന് സമർപ്പിക്കും

വലിയ ചർച്ചകൾക്ക് വഴിതുറന്ന കെ.എസ്.ആർ.ടി.സി ബസുകളിലെ സ്ത്രീകളുടെ സൗജന്യ യാത്രയുമായി ബന്ധപ്പെട്ട അന്തിമ റിപ്പോർട്ട് നാളെ സർക്കാരിന് സമർപ്പിക്കും. കെ.എസ്.ആർ.ടി.സി മാനേജ്‌മെന്റ് നൽകിയ കൃത്യമായ കണക്കുകളുടെയും നിർദ്ദേശങ്ങളുടെയും അടിസ്ഥാനത്തിൽ സംസ്ഥാന ഗതാഗത സെക്രട്ടറി തയാറാക്കിയ ശുപാർശകളാണ് നാളെ ധനകാര്യ-ഗതാഗത മന്ത്രാലയങ്ങൾക്ക് കൈമാറുക. തുടർന്ന് തിങ്കളാഴ്ച ചേരുന്ന സംസ്ഥാന മന്ത്രിസഭാ യോഗത്തിൽ ഈ റിപ്പോർട്ട് വിശദമായി ചർച്ച ചെയ്യും.

സ്ത്രീകൾക്ക് സൗജന്യയാത്ര അനുവദിക്കുമ്പോൾ അത് ഏത് തലത്തിൽ, എങ്ങനെയൊക്കെ നടപ്പാക്കണമെന്ന കാര്യത്തിൽ തിങ്കളാഴ്ചത്തെ മന്ത്രിസഭാ യോഗത്തോടെ പൂർണ്ണമായ തീരുമാനമുണ്ടാകുമെന്നാണ് രാഷ്ട്രീയ കേന്ദ്രങ്ങൾ വിലയിരുത്തുന്നത്. നേരത്തെ പ്രഖ്യാപിച്ചത് പ്രകാരം വരും മാസമായ ജൂൺ 15 മുതലാണ് സംസ്ഥാനത്തെ സ്ത്രീകൾക്കായി കെ.എസ്.ആർ.ടി.സിയിൽ സൗജന്യ ബസ് സർവീസ് പദ്ധതി ആരംഭിക്കാൻ സർക്കാർ ലക്ഷ്യമിടുന്നത്.

ഓർഡിനറി, ഫാസ്റ്റ് പാസഞ്ചർ, സൂപ്പർ ഫാസ്റ്റ് തുടങ്ങി ഓരോ തരം ബസുകളിലും സൗജന്യ യാത്ര നടപ്പാക്കിയാൽ കോർപ്പറേഷന് ഉണ്ടാകാൻ സാധ്യതയുള്ള പ്രതിമാസ, വാർഷിക നഷ്ടത്തിന്റെ കൃത്യമായ കണക്കുകളാണ് കഴിഞ്ഞ ദിവസം കെ.എസ്.ആർ.ടി.സി അധികൃതർ ഗതാഗത സെക്രട്ടറിക്ക് കൈമാറിയിരിക്കുന്നത്. ഓർഡിനറി ബസുകളിൽ മാത്രം ഇളവ് നൽകിയാൽ എത്ര തുകയുടെ അധികബാധ്യത വരും, മറ്റ് ദീർഘദൂര സർവീസുകളിലേക്ക് കൂടി ഇത് വ്യാപിപ്പിച്ചാൽ തുക എത്രയാകും തുടങ്ങിയ വ്യത്യസ്ത പ്ലാനുകൾ റിപ്പോർട്ടിലുണ്ട്. പദ്ധതി നടപ്പാക്കുമ്പോൾ കെ.എസ്.ആർ.ടി.സിക്ക് ഉണ്ടാകുന്ന കനത്ത സാമ്പത്തിക നഷ്ടം സർക്കാർ സബ്‌സിഡിയായി എങ്ങനെ ലഭ്യമാക്കുമെന്ന കാര്യത്തിലും നാളത്തെ റിപ്പോർട്ടിൽ വ്യക്തതയുണ്ടാകും.