സർക്കാർ നീക്കം ചെയ്തത് 15,627 സമൂഹമാധ്യമ പോസ്റ്റുകൾ; മന്ത്രിമാരുടെ ചിത്രങ്ങളുള്ളവയും പട്ടികയിൽ, നിയമസഭയിൽ മറുപടിയുമായി ആഭ്യന്തരമന്ത്രി
വി.ഡി. സതീശൻ സർക്കാർ അധികാരത്തിലേറിയ ശേഷം 15,627 സമൂഹമാധ്യമ പോസ്റ്റുകളോ ലിങ്കുകളോ നീക്കം ചെയ്തതായി ആഭ്യന്തരമന്ത്രി നിയമസഭയിൽ അറിയിച്ചു. സേവ്യർ ചിറ്റിലപ്പള്ളി എം.എൽ.എ ഉന്നയിച്ച ചോദ്യത്തിന് രേഖാമൂലം നൽകിയ മറുപടിയിലാണ് ഈ കണക്കുകളുള്ളത്. നീക്കം ചെയ്തവയിൽ മുഖ്യമന്ത്രിയുടെയും മറ്റ് മന്ത്രിമാരുടെയും ചിത്രങ്ങൾ ഉൾപ്പെടുന്ന പോസ്റ്റുകളുമുണ്ട്. നിലവിലെ സർക്കാർ അധികാരത്തിൽ വന്ന ശേഷം ഫേസ്ബുക്ക്, ഇൻസ്റ്റാഗ്രാം തുടങ്ങിയ സമൂഹമാധ്യമങ്ങളിൽ നിന്നും മുഖ്യമന്ത്രിയുടെയോ മന്ത്രിമാരുടെയോ ചിത്രങ്ങളടങ്ങിയ ന്യൂസ് കാർഡുകൾ, ഫോട്ടോകൾ, വീഡിയോകൾ എന്നിവ നീക്കം ചെയ്യുന്നതിനായി 'സഹ്യോഗ്' പോർട്ടൽ വഴി കേരള പൊലീസ് സ്വീകരിച്ച നടപടികൾ വിശദമാക്കണമെന്നായിരുന്നു ചോദ്യം.
വ്യക്തികൾ നൽകുന്ന പരാതികളുടെ അടിസ്ഥാനത്തിലും, കൃത്രിമമായി എഡിറ്റ് ചെയ്ത വീഡിയോകളും മോർഫ് ചെയ്ത ചിത്രങ്ങളും പ്രചരിപ്പിക്കുന്നത് ശ്രദ്ധയിൽപ്പെടുമ്പോഴും സമൂഹമാധ്യമ പ്ലാറ്റ്ഫോമുകൾക്ക് നോട്ടീസ് നൽകി അവ നീക്കം ചെയ്യാൻ നടപടിയെടുക്കാറുണ്ടെന്ന് ആഭ്യന്തരമന്ത്രി വ്യക്തമാക്കി. ഇത്തരത്തിൽ നീക്കം ചെയ്തവയിൽ മുഖ്യമന്ത്രിയുടെയും മന്ത്രിമാരുടെയും ചിത്രങ്ങളും പോസ്റ്റുകളും ഉൾപ്പെട്ടിട്ടുണ്ട്.
ഇത്തരം പ്രചാരണങ്ങൾ നിരന്തരം നിരീക്ഷിക്കുന്നുണ്ടെന്നും 'സഹ്യോഗ്' പോർട്ടൽ മുഖേനയും അല്ലാതെയും നോട്ടീസ് നൽകി നടപടികൾ സ്വീകരിക്കുന്നുണ്ടെന്നും മറുപടിയിൽ പറയുന്നു. ഈ വിഷയത്തിൽ ആകെ 4,201 പരാതികളാണ് ലഭിച്ചത്. ഇതിൽ 3,472 എണ്ണത്തിൽ നിയമനടപടി സ്വീകരിച്ചു. സർക്കാർ അധികാരമേറ്റ ശേഷം ആകെ 15,627 പോസ്റ്റുകളാണ് ഇത്തരത്തിൽ നീക്കം ചെയ്തതെന്നും ആഭ്യന്തരമന്ത്രി നിയമസഭയെ അറിയിച്ചു.