ലിസ് മാത്യുവിനേയും പ്രീത എ.കെ.യെയും ഹൈക്കോടതി ജഡ്ജിമാരാക്കാൻ ശുപാർശ

സുപ്രീം കോടതിയിലെ സീനിയർ അഭിഭാഷക ലിസ് മാത്യുവിനേയും ഹൈക്കോടതി അഭിഭാഷക എ.കെ. പ്രീതയെയും കേരള ഹൈക്കോടതി ജഡ്ജിമാരാക്കാൻ സുപ്രീം കോടതി കൊളീജിയം ശുപാർശ ചെയ്തു. ചീഫ് ജസ്റ്റിസ് സൂര്യകാന്തിന്റെ അധ്യക്ഷതയിൽ ചേർന്ന യോഗമാണ് കേന്ദ്ര സർക്കാരിന് ഈ ശുപാർശ കൈമാറിയത്. കേന്ദ്ര സർക്കാർ ഇത് അംഗീകരിക്കുന്നതോടെ കേരള ഹൈക്കോടതിയിലെ വനിതാ ജഡ്ജിമാരുടെ എണ്ണം അഞ്ചായി ഉയരും. സുപ്രധാനമായ നിരവധി നിയമപോരാട്ടങ്ങളിൽ പങ്കാളികളായിട്ടുള്ള പ്രഗത്ഭരായ അഭിഭാഷകരാണ് ഇരുവരും.

സുപ്രീം കോടതിയിൽ നിന്ന് കേരള ഹൈക്കോടതി ജഡ്ജി സ്ഥാനത്തെത്തുന്ന ആദ്യ സീനിയർ അഭിഭാഷകയാണ് ലിസ് മാത്യു. മുൻ അറ്റോർണി ജനറൽ കെ.കെ. വേണുഗോപാൽ, മുൻ ജഡ്ജി ഇന്ദു മൽഹോത്ര എന്നിവരുടെ ജൂനിയറായി പ്രവർത്തിച്ചിട്ടുള്ള അവർ, എം.സി. മേത്ത കേസ് ഉൾപ്പെടെ പത്തോളം സുപ്രധാന കേസുകളിൽ അമിക്കസ് ക്യുറിയായി സേവനമനുഷ്ഠിച്ചിട്ടുണ്ട്. ശബരിമല യുവതീ പ്രവേശനക്കേസ്, പത്മനാഭസ്വാമി ക്ഷേത്രം കേസ് എന്നിവയിൽ കേരള സർക്കാരിന് വേണ്ടിയും ആർ.ബി.ഐക്ക് വേണ്ടിയും ഹാജരായിട്ടുണ്ട്. ഭർത്താവ് രാകേന്ദ് ബസന്തും ലിസ് മാത്യുവും ഒരേ ദിവസം സുപ്രീം കോടതിയിൽ സീനിയർ അഭിഭാഷകരായി നിയമിതരായ ദമ്പതികളാണെന്ന പ്രത്യേകതയുമുണ്ട്.

കേരള ഹൈക്കോടതിയിൽ മൂന്ന് പതിറ്റാണ്ടിലേറെ പ്രവർത്തനപരിചയമുള്ള അഭിഭാഷകയാണ് എ.കെ. പ്രീത. മെഡിക്കൽ റെക്കോർഡുകൾ രോഗിയുടെ മൗലികാവകാശമാണെന്ന ചരിത്രപരമായ വിധി നേടിയെടുത്തത് പ്രീത വാദിച്ച കേസിലാണ്. പിങ്ക് പോലീസ് കേസ്, തോട്ടം തൊഴിലാളികളുമായി ബന്ധപ്പെട്ട നിയമവിവാദങ്ങൾ എന്നിവയിലും നിർണ്ണായക വിധികൾ സമ്പാദിക്കാൻ അവർക്ക് സാധിച്ചു. ശബരിമല കേസിലും സജീവമായി ഹാജരായിട്ടുണ്ട്. ഭരണഘടന, തൊഴിൽ നിയമങ്ങൾ എന്നിവയിൽ പ്രത്യേക വൈദഗ്ധ്യമുള്ള പ്രീത, ഹൈക്കോടതി മുൻ ജഡ്ജി എം. രാമചന്ദ്രന്റെ ജൂനിയറായാണ് പ്രാക്ടീസ് ആരംഭിച്ചത്.