രാഹുല്‍ ഗാന്ധിയെക്കുറിച്ച് പറഞ്ഞാല്‍ കലാപാഹ്വാനം, പ്രധാനമന്ത്രിയെ അധിക്ഷേപിച്ചാല്‍ മാനനഷ്ടക്കേസ്; ഇരട്ട നീതിയെന്ന് ആര്‍ ശ്രീലേഖ
ലോക്‌സഭ പ്രതിപക്ഷ നേതാവ് രാഹുല്‍ ഗാന്ധിക്കെതിരായി നടത്തിയ വിവാദ പ്രസംഗത്തില്‍ തനിക്കെതിരെ കേസെടുത്ത പൊലീസിനെതിരെ രൂക്ഷവിമര്‍ശനവുമായി മുന്‍ ഡിജിപിയും ബിജെപി നേതാവുമായ ആര്‍ ശ്രീലേഖ. സര്‍ക്കാരിന്റേത് ഇരട്ട നീതിയാണെന്ന് അവര്‍ ഫെയ്സ്ബുക്ക് പേജില്‍ കുറിച്ചു.
ശ്രീലേഖയുടെ ഫെയ്സ്ബുക്ക് പോസ്റ്റ്
സര്‍ക്കാരിന്റെ ഇരട്ട നീതി!
പ്രധാനമന്ത്രിയെ ആരെങ്കിലും അധിക്ഷേപിച്ച് സംസാരിച്ചാല്‍ അത് പോലീസിന് നേരിട്ട് എടുക്കാനാകാത്ത മാനനഷ്ട കേസ്. രാഹുല്‍ ഗാന്ധിയെക്കുറിച്ച് എന്തെങ്കിലും പറഞ്ഞു എന്ന് പരാതി കിട്ടിയാല്‍ അതില്‍ ക്രിമിനല്‍ കുറ്റമായ കലാപാഹ്വാന കേസ്!
കൊല്ലം പുനലൂരില്‍ നടന്ന ബിജെപി പ്രതിഷേധ ജനസഭയില്‍ സംസാരിക്കവേ, ഡല്‍ഹിയില്‍ രാഹുല്‍ഗാന്ധി നടത്തിയ പ്രതിഷേധത്തെക്കുറിച്ച് ശ്രീലേഖ നടത്തിയ പരാമര്‍ശമാണ് കേസിന് ആധാരം. 'മയക്കുമരുന്ന് അമിതമായി ഉള്ളില്‍ ചെല്ലുമ്പോഴുള്ള വെപ്രാളവും താണ്ഡവവുമാണ് രാഹുല്‍ ഗാന്ധി ഡല്‍ഹിയില്‍ കാണിക്കുന്നത്' എന്നായിരുന്നു പ്രസംഗം. ഇത് കലാപമുണ്ടാക്കാന്‍ ഉദ്ദേശിച്ചുള്ളതാണെന്ന് കാണിച്ച് കോണ്‍ഗ്രസ് നേതാക്കള്‍ നല്‍കിയ പരാതിയിലാണ് ശ്രീലേഖക്ക് എതിതരെ കേസെടുത്തിരിക്കുന്നത്. ഭാരതീയ ന്യായ സംഹിത സെക്ഷന്‍ 192 വകുപ്പ് പ്രകാരം ജാമ്യം ലഭിക്കാവുന്ന കുറ്റമാണ് ചുമത്തിയിട്ടുള്ളത്. പ്രസംഗത്തിന്റെ പേരില്‍ കലാപമുണ്ടായാല്‍ ഒരു വര്‍ഷം വരെ തടവുശിക്ഷയും കലാപം ഉണ്ടായില്ലെങ്കില്‍ ആഹ്വാനത്തിന്റെ പേരില്‍ ആറു മാസം തടവുശിക്ഷയും ലഭിച്ചേക്കാം. വിവാദ പരാമര്‍ശത്തില്‍ ശ്രീലേഖ മാപ്പ് പറയണമെന്ന് ആവശ്യപ്പെട്ട് ആഭ്യന്തര മന്ത്രി രമേശ് ചെന്നിത്തലയും രംഗത്തെത്തിയിരുന്നു.