സി.പി.ഐ.എം കേരള ഘടകത്തിൽ ആഭ്യന്തര പരിഹാര സെൽ നിലവിൽ വന്നു; അഞ്ചംഗ സമിതിയെ ടി.എൻ. സീമ നയിക്കും

പാർട്ടിക്കുള്ളിലെ പരാതികൾ പരിഹരിക്കുന്നതിനായി സി.പി.ഐ.എം കേരള ഘടകത്തിൽ ആഭ്യന്തര പരിഹാര സെൽ (ICC) പുനഃസംഘടിപ്പിച്ചു. ടി.എൻ. സീമ അധ്യക്ഷയായി തുടരുന്ന അഞ്ചംഗ സമിതിയാണ് രൂപീകരിച്ചിരിക്കുന്നത്. സംസ്ഥാന കമ്മിറ്റി അംഗങ്ങളായ എം. വിജയകുമാർ, പി.കെ. സൈനബ, എൻ. ചന്ദ്രൻ, അഭിഭാഷക ടി. ഗീനാ കുമാരി എന്നിവരാണ് സമിതിയിലെ മറ്റ് അംഗങ്ങൾ.

പാലക്കാട് മുൻ ജില്ലാ സെക്രട്ടറി ഇ.എൻ. സുരേഷ് ബാബുവിനെതിരായ പരാതികളുടെ പശ്ചാത്തലത്തിലാണ് ഐ.സി.സി സജീവമാക്കാൻ കേന്ദ്രനേതൃത്വം നിർദ്ദേശം നൽകിയത്. മധുര പാർട്ടി കോൺഗ്രസിന് പിന്നാലെ സംസ്ഥാന കമ്മിറ്റി ഐ.സി.സി രൂപീകരിച്ചിരുന്നെങ്കിലും സജീവമായിരുന്നില്ല.

സ്ത്രീക്കെതിരായ അതിക്രമ പരാതികൾ മാത്രമല്ല, പാർട്ടി നേതാക്കൾക്കെതിരെ ഉയരുന്ന എല്ലാ പരാതികളും ഇനി ഇതിനു കീഴിൽ പരിശോധിക്കും. ജില്ലാ കമ്മിറ്റി അംഗങ്ങൾക്കെതിരായ പരാതികൾ സംസ്ഥാന ഐ.സി.സിയായിരിക്കും അന്വേഷിക്കുക. ഐ.സി.സിക്ക് പരിഹരിക്കാൻ കഴിയാത്ത ഗൗരവകരമായ പരാതികൾ ഉടൻ പൊലീസിന് കൈമാറണമെന്ന് ജനറൽ സെക്രട്ടറി എം.എ. ബേബി നിർദ്ദേശിച്ചിട്ടുണ്ട്.