റിപ്പബ്ലിക് ദിന പരേഡിൽ കേരളത്തിന്റെ വിസ്മയം; ഡിജിറ്റൽ സാക്ഷരതയും വാട്ടർ മെട്രോയും ടാബ്ലോയാകും

ഈ വർഷത്തെ റിപ്പബ്ലിക് ദിന പരേഡിൽ കേരളത്തിന്റെ ടാബ്ലോ (നിശ്ചലദൃശ്യം) കർത്തവ്യപഥിൽ അണിനിരക്കും. കേരളം കൈവരിച്ച 'നൂറ് ശതമാനം ഡിജിറ്റൽ സാക്ഷരത' എന്ന നേട്ടവും വിപ്ലവകരമായ 'കൊച്ചി വാട്ടർ മെട്രോ'യും പ്രമേയമാക്കിയുള്ള ഡിസൈനാണ് കേന്ദ്ര പ്രതിരോധ മന്ത്രാലയം തിരഞ്ഞെടുത്തത്. അഞ്ച് ഘട്ടങ്ങളിലായി നടന്ന കടുത്ത സ്ക്രീനിംഗിന് ശേഷമാണ് കേരളത്തിന് പരേഡിൽ ഇടം ലഭിച്ചത്.

പ്രതിരോധ മന്ത്രാലയം മുന്നോട്ടുവെച്ച 'ആത്മനിർഭർ ഭാരത്' (സ്വയംപര്യാപ്ത ഭാരതം) എന്ന ആശയത്തിന് അനുയോജ്യമായാണ് കേരളം ഈ ഡിസൈൻ തയ്യാറാക്കിയത്. 2023-ലാണ് ഇതിനുമുമ്പ് കേരളത്തിന്റെ ടാബ്ലോ റിപ്പബ്ലിക് ദിന പരേഡിൽ പങ്കെടുത്തത്.

ഈ വർഷം കേരളത്തിന് പുറമെ അസം, തമിഴ്‌നാട്, ഉത്തർപ്രദേശ്, ഗുജറാത്ത് തുടങ്ങി 17 സംസ്ഥാനങ്ങളും ജമ്മു-കശ്മീർ, പുതുച്ചേരി എന്നീ കേന്ദ്രഭരണ പ്രദേശങ്ങളും വിവിധ മന്ത്രാലയങ്ങളുമാണ് പരേഡിൽ ഫ്ലോട്ടുകൾ അവതരിപ്പിക്കാൻ തിരഞ്ഞെടുക്കപ്പെട്ടത്. കേരളത്തിന്റെ സാങ്കേതികവും അടിസ്ഥാന സൗകര്യപരവുമായ വളർച്ച ദേശീയതലത്തിൽ പ്രദർശിപ്പിക്കാനുള്ള അവസരമായാണ് ഇതിനെ കാണുന്നത്.