കുറ്റിപ്പുറം ബസ് അപകടം: കാരണം അമിതവേഗമെന്ന് എം.വി.ഡി റിപ്പോർട്ട്

കുറ്റിപ്പുറത്ത് ബസ് അപകടത്തിൽപ്പെടാൻ പ്രധാന കാരണം അമിതവേഗമാണെന്ന് മോട്ടോർ വാഹന വകുപ്പിന്റെ (MVD) അന്വേഷണ റിപ്പോർട്ട്. ഗതാഗത കമ്മീഷണർക്ക് സമർപ്പിച്ച റിപ്പോർട്ടിലാണ് അപകടത്തിലേക്ക് നയിച്ച സാഹചര്യങ്ങൾ വ്യക്തമാക്കിയിരിക്കുന്നത്. അനുവദനീയമായ വേഗപരിധി 50 കിലോമീറ്ററായിരുന്ന വളവിൽ 100 കിലോമീറ്ററിലേറെ വേഗതയിലാണ് ബസ് സഞ്ചരിച്ചിരുന്നതെന്ന് അന്വേഷണത്തിൽ കണ്ടെത്തി.

അമിതവേഗം കാരണം മഴയിൽ 'ഹൈഡ്രോപ്ലെയിനിങ്' പ്രതിഭാസമുണ്ടാകുകയും ടയറും റോഡും തമ്മിലുള്ള ഘർഷണം നഷ്ടപ്പെട്ട് വാഹനം ഡിവൈഡറിൽ ഇടിക്കുകയുമായിരുന്നു. യാത്രക്കാരുടെ മൊഴികളും സി.സി.ടി.വി ദൃശ്യങ്ങളും അമിതവേഗമാണ് അപകട കാരണമെന്ന് ശരിവെക്കുന്നുണ്ട്. ജൂലൈ 26-നുണ്ടായ അപകടത്തിൽ ഒരാൾ മരിക്കുകയും 39 പേർക്ക് പരിക്കേൽക്കുകയും ചെയ്തിരുന്നു. സംഭവത്തിൽ ബസ് ഡ്രൈവർ ഷബീറിനോട് ചോദ്യം ചെയ്യലിന് ഹാജരാകാൻ പോലീസ് നോട്ടീസ് നൽകിയിട്ടുണ്ട്.