'എനിക്ക് പറയാനുള്ളത് കൂടി കേൾക്കൂ...': രാജിപ്രഖ്യാപനത്തിൽ ഞായറാഴ്ച വിശദീകരണം നൽകുമെന്ന് ആർ. ശ്രീലേഖ

തിരുവനന്തപുരം കോർപറേഷനിൽ ബി.ജെ.പി കൗൺസിലറായ ആർ. ശ്രീലേഖ തന്റെ രാജിവാർത്തകളുമായി ബന്ധപ്പെട്ട വിഷയത്തിൽ ഒക്ടോബർ 11 ഞായറാഴ്ച വിശദീകരണം നൽകുമെന്ന് അറിയിച്ചു. മാധ്യമങ്ങൾ തന്റെ രാജിവാർത്ത ആഘോഷമാക്കിയ സാഹചര്യത്തിൽ തനിക്കുമൂടി പറയാനുള്ളത് കേൾക്കണമെന്ന് അവർ ഫേസ്ബുക്കിലൂടെ അഭ്യർഥിച്ചു. സെപ്റ്റംബർ 30-ന് ശ്രീലേഖ മേയർ വി.വി. രാജേഷിന് രാജിക്കത്ത് നൽകിയെന്ന വാർത്ത പുറത്തുവന്നതിന് പിന്നാലെ ബി.ജെ.പി സംസ്ഥാന നേതൃത്വം അനുനയ നീക്കങ്ങളുമായി രംഗത്തെത്തിയിരുന്നു.

ആശുപത്രിയിൽ കഴിയുന്ന ശ്രീലേഖയെ ബി.ജെ.പി നേതാക്കൾ സന്ദർശിക്കുകയും രാജിവാർത്തകൾ തള്ളുകയും ചെയ്തിരുന്നു. മേയർ സ്ഥാനം നൽകാത്തതിലുള്ള അതൃപ്തിയാണ് ശ്രീലേഖയുടെ നീക്കത്തിന് പിന്നിലെന്ന റിപ്പോർട്ടുകൾ പാർട്ടിക്ക് വലിയ തലവേദന സൃഷ്ടിച്ചിട്ടുണ്ട്. നിലവിൽ ഒരു സ്വതന്ത്രന്റെ പിന്തുണയോടെ കോർപറേഷൻ ഭരിക്കുന്ന ബി.ജെ.പിക്ക് ശാസ്തമംഗലം വാർഡ് കൗൺസിലറായ ശ്രീലേഖ രാജിവെച്ചാൽ കേവലഭൂരിപക്ഷം നഷ്ടപ്പെടാൻ സാധ്യതയേറെയാണ്.