തൃശ്ശൂർ വെടിക്കെട്ടപകടത്തിൽ മരിച്ചവരിൽ 'തുടക്കം' സിനിമയുടെ മേക്കപ്പ് ആർട്ടിസ്റ്റും; ഹൃദയം തകരുന്നുവെന്ന് ജൂഡ് ആന്തണി

മുണ്ടത്തിക്കോടുണ്ടായ വെടിക്കെട്ടപകടത്തിൽ മരിച്ചവരിൽ സിനിമാ പ്രവർത്തകനും. മേക്കപ്പ് ആർട്ടിസ്റ്റായ ബിജീഷ് ബാലനാണ് അപകടത്തിൽ ജീവൻ നഷ്ടപ്പെട്ടത്. വിസ്മയ മോഹൻലാൽ നായികയായി എത്തുന്ന 'തുടക്കം' എന്ന സിനിമയിലാണ് അദ്ദേഹം അവസാനമായി പ്രവർത്തിച്ചത്. ബിജീഷിന്റെ അപ്രതീക്ഷിത വിയോഗത്തിൽ സിനിമാ രംഗത്തെ നിരവധി പേർ ആദരാഞ്ജലികൾ അർപ്പിച്ചു.

ബിജീഷിന്റെ മരണത്തിൽ 'തുടക്കം' സിനിമയുടെ സംവിധായകൻ ജൂഡ് ആന്തണി ജോസഫ് വലിയ നടുക്കം രേഖപ്പെടുത്തി. "ഹൃദയഭേദകം" എന്നാണ് അദ്ദേഹം സോഷ്യൽ മീഡിയയിൽ പ്രതികരിച്ചത്. ഫെഫ്ക (FEFKA) ഓൾ കേരള മേക്കപ്പ് ആൻഡ് ഹെയർ സ്റ്റൈലിസ്റ്റ് യൂണിയൻ അംഗമായ ബിജീഷ്, 'മാർഗം കളി', 'ഷീ ടാക്സി' തുടങ്ങിയ ശ്രദ്ധേയമായ സിനിമകളിലും പ്രവർത്തിച്ചിട്ടുണ്ട്. ബിജീഷിന്റെ വിയോഗത്തിൽ ഫെഫ്കയും ഔദ്യോഗികമായി ആദരാഞ്ജലികൾ അർപ്പിച്ചു.

മുണ്ടത്തിക്കോട്ടെ പടക്കനിർമ്മാണ ശാലയിലുണ്ടായ സ്ഫോടനത്തിൽ ഇതുവരെ 13 പേരുടെ മരണമാണ് സ്ഥിരീകരിച്ചിട്ടുള്ളത്. മരിച്ചവരിൽ പലരെയും തിരിച്ചറിയാനുള്ള നടപടികൾ പുരോഗമിക്കുന്നതിനിടയിലാണ് ബിജീഷിന്റെ മരണവാർത്ത പുറത്തുവരുന്നത്.